Abel Caballero culpa a Feijóo de que o bus non sexa só para o vigueses

O alcalde de Vigo, Abel Caballero, responsabilizou ao presidente da Xunta, Alberto Núñez Feijóo, da sentenza do Tribunal Superior de Xustiza de Galicia (TSXG) que ratifica a suspensión do requisito de empadroamento para solicitar a tarxeta PassVigo, e asegurou que dita resolución xudicial "baséase nunha lei antiVigo que fixo Feijóo".

Así o manifestou o rexedor olívico, a preguntas dos medios sobre a resolución do alto tribunal galego, que ratifica unha medida cautelar solicitada polo Concello de Redondela, e supón que Vigo non pode impor a esixencia de estar empadroado na cidade para obter un cartón de bus con tarifas bonificadas.

Abel Caballero culpou da situación ao presidente da Xunta e, en concreto, á lei de orzamentos de Galicia de 2016 que, segundo aseverou, "obrígalles aos vigueses a pagarlle o bus á xente de fóra de Vigo". "Foi unha lei feita 'ad hoc' para Vigo, porque non se aplica noutras cidades. Por tanto, os vigueses debémoslle a Feijóo ter que pagar centos de miles de euros para subvencionar o bus á xente de fóra, e quero que o saiban os 300.000 vigueses", proclamou o alcalde.

O rexedor precisou que non se opón a que os veciños doutros municipios teñan viaxes subvencionadas no bus urbano, pero incidiu en que ese custo debe ser asumido pola Xunta de Galicia, xa que se trata de "unha relación supramunicipal".

A ese respecto, recalcou que a lei de orzamentos de 2016 é "inconstitucional", pero que o Concello de Vigo non pode invocar esta situación ante os tribunais. "É algo que reclamo como presidente da FEMP, que os concellos poidan reclamar ante medidas inconstitucionais", engadiu.

TRANSPORTE METROPOLITANO

Pola súa banda, o grupo municipal do PP destacou que o TSXG deu "un segundo pau" ao alcalde, ratificando unha medida dun xulgado vigués, e freando a intención do rexedor de "aplicar unha medida manifestamente ilegal".

Nunhas declaracións remitidas aos medios, a portavoz 'popular', Elena Muñoz, sinalou que Caballero pretendía esixir o empadroamento nas bonificacións de bus urbano "para non facer o que si beneficiaría aos veciños, que é cumprir o convenio do transporte metropolitano".

"Esa é a verdadeira solución, a que é legal e a máis favorable para os intereses dos veciños, que agora non poden acceder a descontos de 600 euros ao ano, porque hai un alcalde que lle interesa seguir coa confrontación", lamentou, e engadiu que, ademais, o cumprimento do convenio do transporte, permitiría "desbloquear outra gran aspiración dos vigueses", que é a Área Metropolitana.