Xulio Ferreiro mostra o seu "respecto" cara ás primarias de En Marea, un proceso que ve "desde a distancia"
O rexedor asegura estar centrado na Coruña e descoñece se os alcaldes das mareas poderían desvincularse logo da vitoria de Villares
Por Europa Press / Redacción | A CORUÑA | 26/12/2018 | Actualizada ás 14:20
O alcalde da Coruña, Xulio Ferreiro, mostrou o seu "respecto" ao resultado das eleccións primarias de En Marea, logo da vitoria do seu portavoz, Luís Villares, e trasladou a súa felicitación aos "vencedores" dun proceso que ve "desde a distancia".
"Eu nunca tentei pór paus nas rodas de ninguén", respondeu a preguntas dos xornalistas despois de que a candidatura 'Coidando a Casa' (Luís Villares) se impuxese con case o 60% dos votos. A lista do sector crítico, 'Entre todas' (David Bruzos), apoiada polos denominados 'alcaldes do cambio' obtivo un 40% de apoio.
Precisamente, preguntado sobre a posibilidade de desvincularse do proxecto de En Marea xunto cos alcaldes de Santiago e Ferrol despois destes resultados, a resposta inicial de Ferreiro foi un "non, non o sei", aínda que máis tarde insistiu en que el ten "a cabeza aquí metida, no Concello da Coruña", onde está a pór "toda a carne no asador".
"NON ESTOU NO DÍA A DÍA"
"As ideas que un ten débeas manter, con todo respecto para o resultado electoral e os encargados de tirar cara adiante", dixo o rexedor herculino, que, a pesar do seu respaldo a Bruzos, asegura ver "desde a distancia" o proceso interno de En Marea.
"Hai meses puxen moito esforzo en que En Marea fose un instrumento útil para Galicia, pero hai que saber o lugar que ocupa un e deixar que outros leven as cousas", afirmou Ferreiro, quen recoñece participar "onde teño que participar", malia que recoñece non estar "no día a día" de En Marea.
