A Pobra lembra a Diana Quer cun acto e unha declaración institucional contra a violencia de xénero

O concello coruñés da Pobra celebrou este luns un acto de recordo da moza madrileña Diana Quer, desaparecida en agosto de 2016 neste municipio, e aprobou e leu unha declaración institucional en contra da violencia de xénero.

O acto, convocado para as 12,00 horas deste último día do ano no Salón de Plenos do Concello, coincidiu co primeiro aniversario da localización do corpo da moza nunha nave abandonada do lugar de Asados, no municipio veciño de Rianxo.

Tras 500 días desaparecida, e un día despois da detención do autor confeso da súa morte, José Enrique Abuín, o cadáver de Diana Quer aparecía finalmente o 31 de decembro de 2017, hai xusto un ano.

Para lembrar á moza, que espertou numerosas mostras de solidariedade e unha gran conmoción na zona, o concello decidiu convocar para este luns un acto de recordo e homenaxe, á vez que aprobou unha declaración institucional.

Nela, ademais de lembrar a Diana, o municipio expresou o seu "compromiso firme" na loita contra a violencia de xénero, apostando pola "concienciación" e a "educación" como principais armas.