Por Galicia Confidencial | Compostela | 14/02/2019 | Actualizada ás 19:08
A Federación de Servizos de Comisións Obreiras de Galicia volveu gañar as eleccións sindicais nas entidades bancarias que operan no país, que aglutinan máis de 3500 traballadores e traballadoras. Tras as votacións, que tiveron lugar o mércores, o sindicato conseguiu 46 delegados e delegadas (32,17 %) de 143 que se elixían.
Jorge Villarino, secretario xeral da agrupación do sector financeiro de CCOO-Servizos, destaca que o persoal volveu depositar a súa confianza en Comisións Obreiras “polo traballo da organización á hora de negociar acordos de profesionalidade, horarios, conciliación, igualdade e incluso o convenio colectivo 2015-2018, que protexeu os dereitos laborais”.
Nun comunicado, o voceiro de CCOO-Servizos lembra que, ante a inminente negociación do novo convenio da banca, “a fortaleza de Comisións será fundamental para evitar os posibles recortes de dereitos que a patronal quererá impor, aproveitando a conxuntura legal derivada da reforma laboral”.
Resultados estatais
No ámbito estatal, CCOO tamén é primeiro sindicato no sector da banca, cun 41,88 % de representación e 936 delegados e delegadas dun total de 2235. O segundo sindicato sitúase a moita distancia, co 20 %.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.