Por E.P. | SANTIAGO DE COMPOSTELA | 17/02/2019 | Actualizada ás 12:39
A eurodeputada do BNG, Ana Miranda, participou este domingo nunhas xornadas sobre a situación dos refuxiados na localidade da Occitania francesa de Tarbes, onde defendeu a "Europa da solidariedade" fronte á "Europa fortaleza da dereita".
"Temos que frear a construción da Europa fortaleza pola que avogan as forzas de extrema dereita e seguir avanzando na Europa da solidariedade", subliñou a eurodeputada nacionalista.
Tal como sinalou o Bloque nun comunicado, Miranda destacou a necesidade de facer "unha cadea de solidariedade" contra a "intransixencia dos Estados" na xestión das situacións dos refuxiados.
Neste sentido, defendeu o establecemento dunha rede de eurodeputados que traballen pola posta en marcha de vías "libres e seguras", así como pola aprobación da normativa de asilo.
"Hai que denunciar o abandono do salvamento marítimo no Mediterráneo e as súas terribles consecuencias para as persoas", engadiu, en referencia ao "cambio" da política migratoria do Goberno central, "que pasou de abrir as portas ao buque Aquarius en xuño a bloquear a actividade dos barcos Aita Mari e Open Arms".
Miranda lembrou que un primeiro paso no establecemento de vías seguras é un visado humanitario, "cuxa tramitación foi aprobada recentemente na Eurocámara". "É necesario axilizar este proceso. Non podemos permitir que se sigan producindo mortes no Mediterráneo polo bloqueo que autorizan gobernos insensibles", sentenciou a eurodeputada galega.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.