Biotecnoloxía para a sustentabilidade do sector téxtil galego

Cinco empresas biotecnolóxicas e a Universidade de Santiago de Compostela (USC) presentaron o proxecto QC4SusTex, que traballa no desenvolvemento de solucións para a verificación da sustentabilidade no sector téxtil.

O acto tivo lugar este martes na Facultade de Ciencias do Campus de Lugo. O proxecto ten como obxectivo "o desenvolvemento de ferramentas para a autentificación en laboratorio de fibras e tecidos adheridos a declaracións ou certificacións de sustentabilidade no sector téxtil e do calzado" e tamén se centra "na avaliación e mellora da seguridade de materiais empregados na produción de moda sustentable", tal e como informou o Clúster Tecnolóxico Empresarial das Ciencias da Vida (Bioga).

Tamén busca "o desenvolvemento dun servizo integral chave en man que permita o control sobre o impacto ambiental nas augas de provedores de retailers do téxtil", engade.

O proxecto está financiado pola Axencia Galega de Innovación (GAIN), a través do Programa Conecta-Peme, cofinanciado por Fondos Europeos para o Desenvolvemento Rexional (Feder) e apoiado pola Consellería de Economía, Emprego e Industria.