A Policía Nacional en Santiago sinala a "boa colaboración" coa seguridade privada na cidade
En Santiago existen diversos ámbitos con seguridade privada, como son a universidade, as grandes cadeas comerciais, empresas ou o polígono industrial, que están coordinados coa Policía Nacional.
Por E.P. | SANTIAGO DE COMPOSTELA | 27/02/2019 | Actualizada ás 16:23
Santiago de Compostela afronta o próximo incremento de peregrinos e turismos, en especial, ante a celebración do ano Xacobeo en 2021, cunha "moi boa colaboración" entre a Policía Nacional e a seguridade privada, xunto coa Policía Local.
Así o transmitiu o Comisario Xefe da Policía Nacional na cidade, Félix García, no transcurso da 'Xornada formativa para directores de seguridade, xefes de seguridade, detectives privados e responsables de centros de formación de vixiantes de seguridade' que se celebrou en Santiago coa participación duns 60 responsables deste ámbito, para profundar na colaboración coas forzas de seguridade do Estado. En Santiago existen diversos ámbitos con seguridade privada, como son a universidade, as grandes cadeas comerciais, empresas como Finsa ou o polígono industrial, que están coordinados coa Policía Nacional.
A través do grupo de seguridade privada teñen o contacto directo coa Policía Nacional e "a relación é boa", explicou Félix García. Mediante sistemas de coordinación denominados Rede Azul e Rede Azul Opera, os membros de seguridade privada poden acceder a "novidades ou incidencias". Pero máis aló do día a día, a necesidade de coordinación increméntase de cara o 2021, Ano Xacobeo, no que se prevé un aumento de turistas e peregrinos.
"Queremos unha campaña de seguridade para o Camiño de Santiago e estamos a establecer unhas liñas de seguridade para o 2021", coa previsión de contar con máis efectivos, tamén ante a posibilidade de que acudan autoridades á cidade e profundando na coordinación, porque "é un ano crítico de seguridade".
En todo caso, puxo en valor a boa colaboración tanto coa seguridade privada como coa Policía Local que permiten que Santiago "sexa unha cidade bastante segura" na que só se rexistren "temas menores". Félix García puxo en valor que "en seguridade, colaborar sempre suma e non colaborar sempre resta" e eloxiou aos vixiantes do polígono do Tambre, que facilitaron desarticular unha banda que tiña previsto cometer roubos.
Ante a celebración do Xacobeo 2021 José González, delegado de participación cidadá da Policía Nacional, explicou que "a coordinación entre as distintas forzas leva a cabo con reunións previas que teñen lugar con anterioridade á masiva afluencia de peregrinos e turistas e nas que participan todos os sectores afectados, tanto seguridade privada como Garda Civil, Policía Autonómica, Local, Protección Civil e Policía Nacional".
"Vanse articulando mecanismos de colaboración, vanse achegando as novidades que van xurdindo e vaise moldeando o dispositivo, que por natureza xa é flexible para adecuar ás necesidades que xurdan", nun dispositivo no que "por norma xeral o incremento de efectivos xa se fai a partir de xuño ata agosto ou setembro".
