Galicia terá este martes aviso amarelo por ventos fortes de máis de 80 quilómetros por hora
Entra unha borrasca que deixará grandes precipitacións.
Por Europa Press / Redacción | SANTIAGO DE COMPOSTELA | 05/03/2019 | Actualizada ás 09:13
Galicia terá este martes, a partir do mediodía, aviso amarelo por ventos fortes de máis de 80 quilómetros por hora debido ao paso dunha nova borrasca.
Segundo o Boletín de tempo meteorolóxico con avisos publicado por Meteogalicia, recollido por Europa Press, unha nova borrasca afectará a Galicia, deixando unha tarde de choivas intensas no oeste e de vento forte no litoral atlántico e nas zonas altas do interior.
O aviso amarelo por vento forte comezará ás 12,00 horas nas zonas da Mariña luguesa, así como oeste e noroeste da Coruña, mentres que a partir das 15,00 horas activarase na montaña de Ourense e no suroeste da Coruña.
Así mesmo, ás 18,00 horas entrará o aviso amarelo por ventos de máis de 80 km/h na provincia de Pontevedra, sur e noroeste de Ourense, montaña e centro de Lugo e interior da provincia da Coruña.
Mentres, a partir das 15,00 horas haberá aviso amarelo por precipitacións de máis de 40 litros por metro cadrado acumuladas no suroeste e oeste da Coruña e interior da provincia de Pontevedra.
