O BNG levará ao pleno unha lei de memoria histórica que recolle a devolución dos bens "expoliados"
O Bloque cre que o PPdeG deberá "dicir se está ao lado da democracia ou se queren ser cómplices da herdanza" da ditadura.
Por E.P. | SANTIAGO DE COMPOSTELA | 06/03/2019 | Actualizada ás 14:53
O pleno do Parlamento de Galicia debaterá a próxima semana a admisión a trámite dunha proposición lexislativa do BNG para a aprobación dunha Lei de Memoria Histórica autonómica que expón, entre outros asuntos, a devolución a dominio público dos bens "expoliados" e a creación dunha "comisión da verdade" sobre o sucedido durante a Guerra Civil e a posterior ditadura franquista.
O deputado do BNG Luís Bará presentou este mércores un texto lexislativo composto por 69 artigos e oito disposicións adicionais elaboradas durante un proceso "participado" xunto con diferentes colectivos galegos e que se asenta en "resolucións do marco xurídico internacional" relativas a dereitos humanos e a loita contra a impunidade.
O parlamentario incidiu na "necesidade" de contar cunha lexislación propia a nivel galego orientada ao "dereito a saber, a lembrar e á verdade" para así "limpar os pozos negros da Transición" que causaron que o Estado español, segundo Bará, conte con "unha democracia de baixa calidade".
Por iso, Luís Bará interpelou de maneira directa ao Partido Popular de Galicia (PPdeG), cuxos votos, como grupo maioritario na Cámara, son imprescindibles para que a proposición do BNG supere o primeiro trámite parlamentario.
"O PP ten que decidir se está ao lado da democracia ou se queren ser cómplices da herdanza do franquismo", subliñou para logo incidir en que os populares terán que "saír do armario" durante o debate da próxima semana, no que "xa non vale a retórica". "Hai que facelo na práctica, con esta lei", dixo.
Nesta liña, afeou o "paradoxo" de que a Xunta e o PP "poñan tanto empeño en homenaxear ás vítimas do nazismo" pero "non faga a mesmo" coas causadas polo franquismo, o que lle levou a preguntarse se existen "diferentes graos de xenocidio".
LEI DE MEMORIA HISTÓRICA
A proposición de lei do BNG expón a creación dunha "comisión da verdade para saber que pasou" durante os anos da Guerra Civil e a represión franquista, un traballo que, segundo Bará, "non se empezaría de cero" porque xa comezou durante a etapa do bipartito (PSdeG-BNG) na Xunta, aínda que "quedou sen terminar porque foi asfixiado economicamente" tras o retorno dos populares a San Caetano.
Ademais da prohibición de "actos e símbolos" relacionados co fascismo, recolle a posta en marcha dun observatorio e unha oficina de atención ás vítimas, así como a creación dun censo de represaliados polo réxime de Francisco Franco e a localización e exhumación dos restos dos asasinados en fosas comúns para o seu enterro "digno".
Así mesmo, tamén pretende iniciar un estudo dos bens "expoliados" pola familia Franco e os mandatarios da ditadura para a súa devolución ao público. Como exemplo diso, Bará citou o Pazo de Meirás --"símbolo" do espolio en Galicia--, a Casa Cornide da Coruña e as estatuas do Pórtico da Gloria polas que o Concello de Santiago mantén un litixio xudicial cos herdeiros do ditador.
