Procuran a unión do comunismo independentista
O venres 18 de novembro preséntase en Pontevedra o Foro pola Unidade Comunista Galega. O seu obxectivo; "reorganizar aos comunistas galegos para crear unha organización unitaria".
Por Galicia Confidencial | Pontevedra | 06/11/2011 | Actualizada ás 01:23
O Centro Social Revira acollerá este acto, cuxa idea inicial naceu na cidade de Vigo, partindo a iniciativa de persoas a títuo individual, do Ateneo Proletario Galego e do PCPG ( Partido Comunista do Povo Galego ). O seu obxectivo é unir a todas as persoas independentistas e socialistas con filiación política nalgunha organización ou sen ela co obxectivo de "construir un coletivo de debate e de reorganización dos/as comunistas galegas/os para posibilitar a criazón nun futuro dunha organización unitária"
"A iniciativa de foro de debate comunista de carácter unitario, aberto aos comunistas galegos e galegas, organizadas ou non, co fin de traballar en común polos intereses do Proletariado e polo Socialismo, tanto en Galiza como a nivel Internacional", aseguran nun comunicado remitido a GC.
"Clarificación científica"
A aspiración e obxectivos fundamentais do Foro de Unidade Comunista Galega son os de contribuír á "clarificación científica" do proletariado xa que este colectivo entende que sociedade actual tende "á confusión e división actual que debilita á nosa clase e ao propio movemento comunista". Tamén aposta pola coordinación dos esforzos das e dos comunistas galegos, "cara o fortalecemento dos movementos sociais e organizacións do proletariado no seo das súas loitas, e á construción da súa propia organización revolucionaria".
Polo tanto, nesa primeira xuntanza que terá lugar o día 11 de novembro, combinarase o debate, a crítica e autocrítica colectiva para chegar a unha "clarificación ideolóxica, coa acción política no seno do movemento obreiro e popular".
