Por Europa Press / Redacción | SANTIAGO DE COMPOSTELA | 13/03/2019 | Actualizada ás 14:01
A Asesoría Xurídica da Xunta de Galicia avala que o cumprimento do calendario de vacinación oficial sexa un requisito para poder inscribir a un neno nunha escola infantil da rede pública Galiña Azul.
Así o indica a Xunta a través dun comunicado en relación á decisión da Consellería de Política Social de estudar a implantación desta condición no acceso ás prazas públicas para nenos de cero a tres anos.
No informe da Asesoría Xurídica recálcase que neste asunto é "prioritaria a protección da saúde dos menores", algo que recoñece o artigo 43 da Constitución española, e considera que "non se conculca de ningún modo a liberdade ideolóxica, relixiosa ou de culto das familias". Así, avala a esixencia da vacinación para acceder a unha praza baseándose en sentenzas dos Tribunais Superiores de Xustiza de Cataluña e A Rioxa, entre outras. Ademais, pon de manifesto que as comunidades autónomas de Estremadura e Castela e León xa requiren o calendario de vacinación para formalizar a matrícula.
A nivel internacional, engade, o informe xurídico cita exemplos como Francia e Italia, que introduciron esta obriga ao longo dos últimos anos, mentres que en Países Baixos está a estudarse.
Do mesmo xeito, o informe recolle a "postura favorable" dos profesionais sanitarios, a través da Comisión Central de Deontoloxía da Organización Médica Colexial e da Rede Galega de Investigación Pediátrica.
O obxectivo da medida, apunta a Xunta, é "avanzar na concienciación dos pais sobre a necesidade de inmunizar aos seus fillos ante posibles contagios, "velando polo ben común dos menores".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.