Por E.P. | SANTIAGO DE COMPOSTELA | 16/03/2019 | Actualizada ás 16:44
A Federación Rural Galega (Fruga) esixiu á Consellería do Medio Rural que cubra as prazas vacantes nas oficinas agrarias comarcais e criticou ao Goberno galego polo "nulo interese" que mostra "pola mellora das condicións no medio rural".
Nun comunicado, a Fruga explicou que estas oficinas "supoñen un importante servizo para as explotacións gandeiras" de Galicia, e que a "carencia de técnicos", con máis dun centenar de prazas vacantes, "poden supor importantes perdas" para estas explotacións.
Así, a federación criticou ao presidente da Xunta de Galicia, Alberto Núñez Feijóo, polo "seu anuncio feito ao principio da lexislatura de considerala como a lexislatura do rural", algo que consideran "un brinde ao sol ou unha fraude".
Por estes motivos, demandou que "se dote ao agro galego dunha nova estrutura adaptada ás novas realidades do mundo rural, co fin de garantir maior eficiencia e facilitar os trámites". Fruga esixiu ao conselleiro de Medio Rural, José González, que "cubra todas as necesidades de persoal que se necesita nas oficinas agrarias".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.