Luís Villares denuncia unha "grande estafa das eléctricas, razón pola que está en perigo Alcoa"
O portavoz de En Marea reclama unha estabilización dos prezos que dea certeza ás industrias electrointensivas, un abaratamento dos custos de produción para a industria e do prezo da luz, así como acabar coas portas xiratorias.
Por Europa Press / Redacción | SANTIAGO DE COMPOSTELA | 25/03/2019 | Actualizada ás 18:22
En Marea presentou este luns as alegacións que formulará ao estatuto dos consumidores electrointensivos. Defende unha regulación do sector que distribúa as cargas e os beneficios entre toda a sociedade.
Nunha rolda na que participaron o deputado Francisco Casal e o traballador de Alcoa e integrante da formación rupturista Javier Arca, o portavoz de En Marea, Luís Villares, reclamou unha estabilización dos prezos que dea certeza ás industrias electrointensivas, un abaratamento dos custos de produción para a industria e do prezo da luz, así como acabar coas portas xiratorias.
"Sabemos que unha parte importante do problema é pola presión que exercen os lobbies sobre os partidos como consecuencia de ter sentados nos seus consellos de administración a antigos presidentes, ministros ou altos cargos do Goberno", sinalou. "Existe unha grande estafa das eléctricas a todos nós e esa é a razón pola que están en perigo Aloca, moitas empresas electrointensivas e outras do sector industrial do país", indicou Villares, que considerou necesario "atacar as causas" para facer viable Aloca, as electrointensivas e o tecido industrial galego.
Así mesmo, reivindicou o papel de En Marea fronte a un PP que creou un marco regulador "claramente favorable ás grandes eléctricas en detrimento de os consumidores e a industria"; así como fronte a un PSOE que "non creou un novo estatuto regulador, ademais de reducir os orzamentos para as electrointensivas".
MEDIDAS
Pola súa banda, o deputado Francisco Casal debullou as alegacións que presenta En Marea, tanto as que se deben de aplicar de forma inmediata como outras a medio prazo. Entre elas, destacou a necesidade dunha nova regulación que faga baixar o prezo almacenista da electricidade. "En Noruega, por exemplo, non lle teñen que dar axudas ás electrointensivas porque pagan a metade ou menos que en España", asegurou nunha intervención na que tamén criticou a postura mantida por Feijóo pola súa alternativa ao estatuto presentado polo PSOE sexa que "paguen os fogares, o resto de empresas e os autónomos".
Fronte a iso, propuxo desenvolver unha convocatoria especial de licenzas de instalación ou repotenciación de parques de enerxía renovable condicionadas á contratación bilateral estable a longo prazo con industrias electrointensivas, grupos pechados de distribución e comercializadoras do mercado doméstico a prezo taxado na contorna dos 32 euros por megawatt, un prezo "totalmente rendible" para as produtoras coas novas tecnoloxías dispoñibles.
Do mesmo xeito, considerou "moi importante" que os xeradores e os comercializadores estean totalmente diferenciados. "Non pode ser que quen venda e quen compra sexan as mesmas empresas", considerou Francisco Casal. Por último, o traballador de Aloca e número dous de En Marea ao Congreso por Lugo, Javier Arca, advertiu de que a fábrica de San Cibrao "non pode sobrevivir na situación actual durante moito tempo". "A venda da fábrica da Coruña e, en xeral a viabilidade das factorías, vai estar condicionada a que se chegue a un acordo para fixar un prezo para a electricidade", sinalou o traballador, que lembrou que máis de 2.000 familias viven da planta na Mariña.
