Solicitan a catalogación de bens culturais arredor da canteira de Teo

A Plataforma Casalonga Limpa de Residuos  presentou senllos escritos na Dirección Xeral de Patrimonio da Xunta e no Concello de Teo. Cos dous documentos instan a “ámbalas dúas administracións á catalogación dunha serie de bens culturais que poderían ser incorporados ao PXOM do Concello de Teo”.

Os elementos sinalados estarían sen catalogar e a súa ubicación estaría “na contorna inmediata da canteira da Casalonga, lugar onde se rexistra unha elevada concentración de bens culturais xa catalogados”, polo que consideran que “sería necesaria a realización dun inventario arqueolóxico da zona”.

Así mesmo, a Plataforma insta ás administracións competentes que requiran á empresa titular do dereito de explotación da canteira, que presente unha serie de documentos. “Un estudo de impacto arqueolóxico da zona. Unha autorización previa ante calquera movemento de terras que se pretenda realizar na área de amortecemento de calquera dos bens arqueolóxicos e o seguemento das obras por un técnico asignado ao efecto”.