Por Europa Press / Redacción | SANTIAGO DE COMPOSTELA | 23/04/2019 | Actualizada ás 19:09
A Asociación Pola Defensa da Ría (APDR) culpou a Xunta de Galicia de "ver para outro lado" ante as verteduras que Ence realiza á ría de Pontevedra e mostrou a súa sorpresa ante a "falta de rigor e de obxectividade" das declaracións da conselleira de Medio Ambiente, Ángeles Vázquez, quen asegurou que a planta "non contaminaba".
Así o expresou este colectivo nunha carta aberta dirixida á conselleira, quen transmitiu "un grao de parcialidade na defensa da empresa que di ben pouco dun cargo público que debe representar e defender os dereitos do conxunto da cidadanía fronte ao interese particular dunha empresa privada".
Neste sentido, a APDR remítese a datos que facilita a propia empresa á Xunta para advertir que as verteduras da planta de Lourizán "incumpren os límites fixados" en varias directivas da Unión Europea. "E vostedes seguen mirando para outro lado!", esgrime.
Ademais, alerta das "elevadas cargas de coliformes fecais e outras bacterias" das verteduras, segundo datos recollidos "nas inspeccións que a Xunta realiza" en Lourizán. "Pero claro, para vostede é máis fácil obviar esta realidade", espeta a Vázquez a APDR.
Finalmente, a asociación asegura que "o que está en cuestión hoxe non é se Ence contamina ou non", senón que a empresa "non pode seguir na ría por máis tempo, porque a prórroga concedida por Mariano Rajoy foi ilegal e a súa concesión caducou definitivamente en xullo de 2018".
"Ence ten que abandonar Lourizán e, en toco caso, buscar unha alternativa para trasladarse, asumindo que, de non querer facelo en Galicia, terá que marcharse fóra, por suposto", sentencia o colectivo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.