Consenso parlamentario para solicitar o indulto do expresidente dos 'percebeiros' de Lira
O 'percebeiro', "que non ten ningún antecedente previo", defendeuse co "único" que tiña a man (un aparello de marisquear) "dunha agresión máis que segura, ferindo a un dos atacantes".
Por E.P. | SANTIAGO DE COMPOSTELA | 30/04/2019 | Actualizada ás 16:33
Todos os partidos políticos con representación no Parlamento de Galicia --PPdeG, En Marea, PSdeG e BNG-- votaron este luns a favor de pedir ao Goberno central o indulto de Manuel Martínez Lustres, o expresidente dos 'percebeiros' de Lira (Carnota, A Coruña), que está condenado a tres anos de prisión pola Audiencia Provincial da Coruña por un incidente cun furtivo.
Tal como explicou no pleno deste martes a deputada nacionalista María Montserrat Prado Cores, impulsora desta proposición non de lei, os feitos remóntanse ao verán de 2013, cando un grupo de furtivos foi confrontado polo colectivo de 'percebeiros' profesionais que faenaban legalmente na localidade de Lira, entre os que se atopaba Martínez Lustres.
"Esa mesma noite o grupo de furtivos presentouse no domicilio do condenado, ante o que causaron fortes disturbios. Ao non lograr o seu obxectivo de confrontalo, volveron a Lira días despois, localizando a Manuel Martínez na súa caseta, onde si lograrían confrontar para ameazalo e intimidalo", explicou Prado Cores.
Así, o 'percebeiro', "que non ten ningún antecedente previo", defendeuse co "único" que tiña a man (un aparello de marisquear) "dunha agresión máis que segura, ferindo a un dos atacantes", polo que lle ocasionou "lesións das que o furtivo tardou varios meses en recuperarse", e das cales Martínez se fixo cargo do custo da asistencia sanitaria.
PERSOA HONRADA
Neste sentido, a parlamentaria popular María Soraya Salorio Porral destacou que o PPdeG non avoga pola violencia para solucionar os problemas e sinalou que "está ao lado do sector". "Por iso pedimos concienciación. Se hai furtivismo é porque hai quen compra aos furtivos", indicou Salorio, quen lamentou que de ocorrer "entraría no cárcere unha persoa honrada", xa que, ao seu xuízo, "el non foi a buscar a ninguén".
Así, desde o PSdeG, María Dores Toja Suárez insistiu na necesidade de que a persoa agredida tamén pida o indulto para Manuel Martínez Lustres, "xa que isto acurtaría os trámites en gran medida". Tamén En Marea mostrou a súa posición a favor de pedir o indulto. O seu deputado Francisco Casal Vidal asegurou que "o condenado xa se resarciu co pago da indemnización". Ademais, engadiu que "cunha boa defensa, pagaría unha multa, dada a evidencia que actuou en defensa propia".
