Por Europa Press / Redacción | SANTIAGO DE COMPOSTELA | 30/04/2019 | Actualizada ás 22:13
Traballadores de Ence increparon con berros de 'Vende-obreiros' e 'Lerchos' ao grupo de goberno formado por BNG e PSOE durante o pleno do Concello de Poio, o último deste mandato antes das eleccións municipais.
Os votos do bipartito e da concelleira non adscrita, Silvia Díaz (de Avante Poio, e que pertencía ao grupo nacionalista) rexeitaron unha moción do PP que pedía "apoio e solidariedade" da corporación aos empregados directos e indirectos da fábrica, provocando á ira do persoal que arroxou os seus carteis coas lemas 'Ence si paro non' ante o alcalde e os edís.
Antes do pleno, que comezou cuns 10 minutos de atraso sobre a hora prevista debido á pitada e ás protestas dos traballadores, uns 150 operarios de Ence concentráronse ante o Concello cunha pancarta coa mensaxe 'Polo pan dous nosos fillos, si a Ence'. A maioría accedeu ao salón de plenos para seguir o debate da moción.
O portavoz do PP, Ángel Moldes, expresou a súa "sorpresa" pola presenza de axentes da Policía Local e da Garda Civil argumentando que "os veciños non son delincuentes, senón traballadores". O alcalde, Luciano Sobral, replicou que os efectivos policiais foran convocados pola subdelegación do Goberno, non polo Concello, ademais de mostrarse "seguro" de que non sería necesaria a súa intervención.
No entanto, ningún dos portavoces do BNG nin do PSOE puido exercer integramente a súa quenda de réplica polas constantes interrupcións dos traballadores. Un dos empregados, que dixo ser economista, expuxo que Ence recibía "premios internacionais a nivel medio ambiental" fronte ás sancións europeas pola presenza de "augas fecais" na Ría. Ademais de insistir en que o traslado da factoría custaría 800 millóns de euros e "non é viable", esixiu ao goberno local de Poio "non falar desde a demagoxia" e "ser sensatos".
Pola súa banda, o portavoz do BNG, Xulio Barreiro, sinalou que o seu partido "non enganou a ninguén" e sempre tivo "a mesma postura" a favor do peche de ENCE. O seu homólogo do PSOE, Gregorio Agís, mostrouse partidario do "traslado mantendo os postos de traballo". Pola contra, a presidenta do comité de empresa nas oficinas centrais de Ence, Ana Cedeira, cualificou de "irresponsables, impresentables e lerchas" aos representantes de ambos os partidos e acusou ao PSOE de actuar "por votos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.