Por Europa Press / Redacción | SANTIAGO DE COMPOSTELA | 25/05/2019 | Actualizada ás 11:23
Un colexio electoral de Boiro, na provincia da Coruña, será pioneiro este domingo ao estar adaptado para o voto das persoas con discapacidade intelectual.
A iniciativa para adaptar o centro electoral do colexio de educación infantil e primaria Pazos-Comoxo, situado en Comoxo (Boiro) xurdiu da Asociación Amicos e foi presentada a través da Delegación do Goberno en Galicia.
A Xunta Electoral da Zona de Noia apoiou este venres a proposta, que beneficiará a unhas 80 persoas que están censadas neste punto.
Desta forma, membros da Asociación acudirán á primeira hora para desenvolver a iniciativa, que axudará ás persoas con discapacidade intelectual a votar nas eleccións municipais e europeas, entre o dez e as doce da mañá.
Á entrada do colexio situarase un pictograma informativo e outros gráficos de apoio, para indicar as distintas mesas electorais e a actividade nas cabinas de votación, a mesa de papeletas e as propias mesas nas que se vota. Todos os pictogramas están apoiados polo Ministerio de Sanidade.
"O obxectivo último deste proxecto é facilitar a súa participación o día das eleccións, adaptando as instalacións, mesa electoral e recursos para a súa comprensión, servindo como experiencia para unha posible adaptación en futuros procesos electorais", sinalou a entidade, que remarca que é "fundamental crear espazos para todos e construír comunidades inclusivas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.