Por E.P. | SANTIAGO DE COMPOSTELA | 21/06/2019 | Actualizada ás 14:32
O secretario de Organización de Ciudadanos Galicia, Laureano Bermejo, informou este venres da apertura dun expediente sancionador e a consecuente revogación da filiación ao seu único concelleiro en Malpica, Alfredo Cañizo, que sumou o seu voto ao dos edís do BNG e o catro do PSOE para que o socialista Walter Pardo accedese á Alcaldía o pasado sábado.
Segundo explicou Bermejo nunha rolda de prensa celebrada na sede da formación laranxa en Santiago, esta decisión prodúcese despois de que Cañizo "non respectase a política de pactos marcada por Madrid" e optase por "pactar con determinados partidos para os que non estaba autorizado".
Neste sentido, o secretario de Organización de Cs en Galicia xustificou a expulsión do edil en que o BNG "foi en coalición con Bildu" nas eleccións europeas. "E máis tendo en conta que a primeira persoa asasinada por ETA era, precisamente, de Malpica", engadiu.
Deste xeito materialízanse as medidas que hai unha semana anunciou o partido de Albert Rivera despois de saberse que Cañizo actuou "de maneira unilateral" e "sen consentimento" para facer alcalde ao candidato socialista.
Nas eleccións municipais do 26 de maio, o PP perdera a maioría absoluta ao retroceder un edil e quedar en seis. O PSOE foi a segunda forza máis votada, con catro edís, mentres que o Bloque obtivo dous representantes e Ciudadanos un.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.