O PP vota en contra de limitar o prezo dos alugueres, mentres En Marea alerta dunha situación "crítica"
Os populares denegan unha iniciativa socialista para que os servizos provinciais de Patrimonio conten con máis medios
Por Europa Press / Redacción | SANTIAGO DE COMPOSTELA | 10/07/2019 | Actualizada ás 14:43
O Partido Popular votou en contra no pleno deste mércores dunha iniciativa de En Marea --apoiada polo resto da oposición-- para instar a que o Goberno central limite o prezo dos alugueres en función de características da zona e as propiedades dos inmobles.
A deputada de En Marea Julia Torregrosa alertou dunha situación "crítica" en materia de vivenda en Galicia, cun aumento dos desafiuzamentos un 12% no segundo semestre de 2018 ata case 800.
Neste sentido, Torregrosa advirte de que a fenda entre os prezos de aluguer e os salarios aumenta "constantemente", mentres os mozos galegos "cun salario medio de 900 euros dificilmente poden afrontar un aluguer".
María Pierres (PSdeG) dixo que os socialistas están "moi preocupados" pola subida de alugueres e defende que "xa se iniciaron" as medidas por parte do Estado para a limitación de prezos, cun Goberno central que "segue facendo os seus deberes". Con todo, considera "imprescindible" que tamén a Xunta se implique.
O deputado do BNG Luís Bará alertou da situación de "emerxencia social" en vivenda, con "cifras astronómicas e pornográficas de subida" de alugueres mentres se "devalúan os salarios". Por iso, chama a ir "á raíz do problema" e atallar a especulación.
Así mesmo, Davide Rodríguez (Grupo mixto), pon de exemplo que Portugal "mira polos seus habitantes" con topes para os alugueres e con incentivos para clases populares, fronte á inacción da Xunta.
NEGATIVA DO PP
En cambio, Jaime Castiñeira (PP) tachou de "auténtico fracaso" as medidas de limitación de prezos de alugueres impulsadas en cidades como París e Berlín. De tal modo, considera que a proposta de En Marea "non achega nada".
Ademais, sostén que é "falso" que Portugal vaia a limitar prezos, senón que asegura que é unha "copia" do plan de vivendas baleiras da Xunta, ao que "todas as esquerdas opuxéronse radicalmente para que non funcionase".
A votación durou varios minutos ao tentar transaccionar En Marea con grupos da oposición algunhas emendas, pero finalmente non saíu adiante ningún acordo co voto en contra do PP. "Mira que lle demos voltas!", queixouse o presidente da Cámara, Miguel Santalices.
