Fomento destina 10,33 millóns a un contrato de conservación de estradas do Estado na Coruña
Por E.P. | SANTIAGO DE COMPOSTELA | 23/07/2019 | Actualizada ás 13:25
O Ministerio de Fomento, segundo recolle este martes o Boletín Oficial do Estado (BOE), licitou o contrato de servizos para a execución de diversas operacións de conservación e explotación en estradas do Estado nun sector da Coruña, cun orzamento de 10.331.935 euros.
En concreto, este sector inclúe a autovía A-54 entre os quilómetros 66,4 e 93,4, na ligazón coa N-547; a SC-21, na ligazón entre a A-54 e o Aeroporto de Santiago; a SC-20 entre o Polígono do Tambre e O Milladoiro; a SC-11 na ligazón entre a SC-20 coa AP-9; a N-525, entre os quilómetros 321 e 337; a N-547 entre os quilómetros 42,6 e 88,4; a N-550 entre os quilómetros 67 e 83; a N-550a, entre os quilómetros 80,6 e 83,6, e a N-634 en Curtis, na ligazón coa N-547 e a A-54, así como na zona de Ponte Carreira.
Os contratos de servizos para a execución de de operacións de conservación e explotación na Rede de Estradas do Estado teñen o obxectivo de realizar os traballos de servizos de comunicacións, vixilancia, atención a accidentes, mantemento dos elementos da estrada, mantemento sistemático das instalacións de subministración de enerxía eléctrica, iluminación, sinalización variable e semaforización.
Ademais, engadiu Fomento, inclúense os labores de establecemento de inventarios e recoñecementos de estado, axenda de información de estado e funcionamento da estrada, programación, coordinación, seguimento e información da execución dos traballos, actuacións de apoio á explotación, estudos de accidentalidade e informes de seguridade viaria.
Finalmente, realizaranse os traballos de roza, fresados e reposición do firme, limpeza de cunetas, e en xeral, todos os labores de conservación ordinaria das vías ao seu cargo.
