O alcalde de Mazaricos critica que os veciños "só reciben as migallas" da explotación eólica
Juan Blanco, do BNG, así o destacou durante unha visita dos deputados do seu mesmo partido Luís Bará e Xose Luís Rivas, "Mini".
Por Europa Press / Redacción | SANTIAGO DE COMPOSTELA | 09/08/2019 | Actualizada ás 14:28
O alcalde de Mazaricos , Juan Blanco, do BNG, denunciou que o seu concello "só recibe as migallas" da explotación eólica. Así o destacou durante unha visita este venres dos deputados do Bloque Luís Bará e Xosé Luís Rivas, 'Mini', para analizar o impacto dos parques eólicos neste municipio.
O alcalde aproveitou a cita para manifestar o seu malestar coas novas instalacións eólicas que pretenden asentarse en Mazaricos, que, segundo asegura, ocuparán terras de uso agrícola e gandeiro. Segundo os datos presentados polo primeiro edil, "os 120 muíños xeran máis de 30 millóns anuais mentres que o concello e os propietarios das terras reciben as migallas".
O rexedor nacionalista informou aos parlamentarios do Bloque da reclamación do consistorio á Xunta de Galicia con respecto ao Fondo de Compensación Ambiental. Segundo o alcalde, "a Xunta recada 700.000 euros do canon eólico e o concello 200.000, cando debería percibir como mínimo o 50%".
Tras a súa visita a Mazaricos, os deputados nacionalistas denunciaron "extorsión" das empresas eólicas aos propietarios e ao concello coa complicidade do Executivo autonómico. Para 'Mini', é "un auténtico espolio dos recursos da riqueza do territorio" e "unha rapina perpetrada coa complicidade da Xunta de Galicia, que aprobou a chamada lei de depredación para porlle fácil ás empresas a tramitación dos parques, pasando por encima dos intereses dos propietarios e os concellos".
