Ampliado o orzamento para o programa de infravivenda
Entre os requisitos que se recollían na convocatoria do programa deste ano, o inmoble obxecto da actuación pode ser propiedade dos seus moradores ou do concello, pero en ambos os casos a axuda debe ser solicitada pola propia administración local.
Por E.P. | SANTIAGO DE COMPOSTELA | 20/08/2019 | Actualizada ás 19:38
A Consellería de Medio Ambiente, Territorio e Vivenda, a través do Instituto Galego da Vivenda e Solo (IGVS), ampliou o orzamento destinado este ano ao programa de infravivenda, unha liña de axudas específica para facilitar a rehabilitación de inmobles que non reúnen os requisitos mínimos de habitabilidade e están emprazados en concellos de menos de 10.000 habitantes.
Así, segundo recóllese na resolución publicada este martes no Diario Oficial de Galicia (DOG), a Xunta autorizou un incremento de 90.000 euros na dotación inicial do programa para este exercicio, polo que disporá de 290.000 euros, debido a que o importe das subvencións correspondentes ás solicitudes presentadas superou o previsto inicialmente, segundo indicou nun comunicado o Executivo autonómico.
"Esta ampliación, en todo caso, non implicará a apertura doutro prazo para presentar novas solicitudes nin o inicio dun novo período para resolver as xa presentadas por parte do IGVS", destacou. Entre os requisitos que se recollían na convocatoria do programa deste ano, o inmoble obxecto da actuación pode ser propiedade dos seus moradores ou do concello, pero en ambos os casos a axuda debe ser solicitada pola propia administración local.
Así mesmo, os ocupantes das vivendas deben acreditar que os seus ingresos non superan unha vez o Indicador Público de Renda de Efectos Múltiples e a casa terá que destinarse a solucionar problemas de infravivenda durante un prazo non inferior a cinco anos. O importe da axuda equivalerá ao 95% do custo da obra de rehabilitación, cun límite máximo de 15.000 euros por vivenda.
