O proxecto 'Youtubeir@s' celebra o seu encontro anual co público

O proxecto 'Youtubeir@s' celebrará en Santiago, o próximo 3 de outubro, o evento 'Lista de reprodución ao vivo', un encontro entre o público e a comunidade creadora que creceu nos tres últimos anos ao amparo desta iniciativa.

Este encontro emula en certo xeito as bibliotecas viventes ou, mesmo, "as partidas de xadrez simultáneas". En concreto, segundo explicou a organización, os creadores esperarán no seu posto as visitas dos espectadores e cada 'youtubeir@' levará temas preparados para analizar, mentres que o público, que irá rotando, poderá realizar preguntas e interactuar cos 'vídeos vivos'.

Cada un estenderase un máximo de 20 minutos e ao final desta rolda individual, a segunda fase abrirase a todo o público para pór en común e compartir experiencias. A cita será entre as 18,00 horas e as 20,00 horas no edificio CEA.

Doutra banda, o prazo de presentación aos premios do proxecto estará aberto ata o 27 de setembro, cuxos galardóns ascenderán a 6.500 euros a repartir nas diferentes categorías.