O Exército retírase dos montes galegos
A Brilat dá por "cumprida" a súa misión tras avisar de 80 focos de lume.
Por Europa Press / Redacción | SANTIAGO DE COMPOSTELA | 01/10/2019 | Actualizada ás 14:34
A Brilat concluíu este martes a Operación Sentinela Galego 2019, tras realizar 80 avisos por incendios no mes e medio que estivo activa.
Os avisos das Forzas Armadas sobre incendios, conatos, queimas de restrollo, presenza de persoas sospeitosas e de material incendiario foron facilitados ás autoridades responsables.
Neste dispositivo iniciado o 15 de agosto participou persoal e medios de unidades do exército de terra, en concreto da Brigada Galicia VII (Brilat) procedentes das súas tres bases en Pontevedra, Asturias e Valladolid, así como o Terzo Norte de Infantaría de Mariña (Ferrol), pertencentes á Armada.
Neste mes e medio de operación despregáronse ao redor de 350 militares que percorreron máis de 300.000 quilómetros o que supón máis de 6.500 quilómetros diarios polos montes galegos, con máis de medio centenar de voos con drones.
Segundo informa o Ministerio de Defensa nun comunicado, o obxectivo da operación "considérase cumprido", cun balance "positivo". As unidades militares actuaron nas zonas asignadas pola Xunta de Galicia en tres do catro provincias galegas, baixo o mando táctico do xefe da Brilat, o xeneral de brigada Antonio Romeu Losada.
