Por Galicia Confidencial | SANTIAGO DE COMPOSTELA | 09/10/2019 | Actualizada ás 14:52
A CRTVG incumpriu os protocolos informativos para o tratamento da violencia machista durante os días 16, 17 e 18 de setembro nas informacións sobre o feminicidio de Valga na Televisión de Galicia. Así o manifesta o comité de empresa da propia CRTVG, que critica que nalgúns telexornais tratouse o triplo crime como un suceso convencional, usouse unha linguaxe que normalizaba e violencia machista, ofrecéronse detalles morbosos sen interese informativo e non se contextualizou con mensaxes positivas de expertas e casos de éxito nos que se evitou o asasinato, amais de evitar na maioría dos informativos a inclusión do teléfono de denuncia da violencia machista e, cando se fixo, non se advertiu que a chamada non deixa pegada na factura telefónica.
"A CRTVG ACTUOU COMA CALQUERA TELEVISIÓN PRIVADA"
Así pois, A CRTVG, abonda o comité, "obviou o seu labor de servizo público para actuar como calquera televisión privada na procura de audiencia a calquera prezo". Unha audiencia, asegura, que lle "deu as costas" xa que nos tres días de cobertura do triplo crime foi en descenso nos telexornais.
O caso máis grave foi a reiterada emisión o día 18 de setembro das declaracións dunha familiar do asasino confeso das tres mulleres. Segundo o comité, non se vixiou o uso de testemuñas próximas ao agresor como recomenda o propio Consello de Administración da CRTVG. Deste xeito, abríronse telexornais coas declaracións da irmá do asasino confeso de costas á cámara baixo o titular “Sei que o fixo porque mo dixo e botou ás mans á cabeza”. Nas declaracións que se emiten, a muller asegura que nin el mesmo sabe porqué reaccionou así e atribúelle un suposto arrebato de loucura co que tamén titula a TVG un dos informativos. Malia saír de costas para que non aparecera a súa imaxe, identifícase a muller con nomes e apelidos.
INFORMACIÓN MORBOSA
Os informativos da TVG incumpriron, xa que logo, as “Recomendacións do Consello de Administración da CRTVG sobre o tratamento dos casos de violencia machista nos medios de comunicación públicos galegos”, amais das do Colexio de Xornalistas de Galicia. O comité afirma que "non se respectou a dor das vítimas" e foi a propia "acción decidida do persoal de Informativos a que impediu que se sobrepasasen os límites éticos".
A linguaxe puramente informativa obviouse en reiteradas ocasións e "ofrecéronse detalles morbosos que non viñan ao caso". O comité refírese, por exemplo, a nunha conexión en directo onde se chegou a dicir que a forense que ía realizar as autopsias no mesmo lugar no que se realizou a de Diana Quer. Para o comité este dato non achegaba "ningún interese informativo" e, ademais, estaba sen confirmar e sen contrastar. De feito, as autopsias acabaron practicándose en Pontevedra e non en Santiago.
A actuación da dirección de Informativos da CRTVG provocou durante eses días unha maior tensión na Redacción, afectando ao traballo do persoal e á situación emocional, que mesmo provocou bagoas na redacción polas presións recibidas, aseguran dende o comité. Esixen, por todo isto, que a dirección de Informativos respecte o traballo profesional no departamento e non obrigue nin transmita ordes para incumprir tanto os códigos deontolóxicos profesionais como as obrigas legais que teñen como servizo público.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.