Pontón sobre o 10N: "estamos a crecer, o 28A quedamos ás portas de obter representación"

Evita confirmar se aspira a alianzas con outras forzas nacionalistas para as galegas de 2020 tras o pacto con CxG, aínda que di que Anova vai con "forzas estatais", en alusión a Podemos e EU. Aspira a que o BNG sexa "decisivo" no Congreso.

Por E.P. | SANTIAGO DE COMPOSTELA | 13/10/2019 | Actualizada ás 14:13

Comparte esta noticia

A portavoz nacional do BNG, Ana Pontón, móstrase "optimista" de cara ás eleccións xerais do 10 de novembro e aspira a lograr representación no Congreso para ser "decisivos" na investidura nun panorama sen maiorías absolutas.

Así o manifestou a líder dos nacionalistas galegos nunha entrevista concedida á Radio Galega este domingo, recollida por Europa Press, na que destacou que o Bloque é a "única" candidatura galega "con independencia" das forzas estatais, que "o único que traen" a Galicia "son problemas".

Neste sentido, Pontón incidiu en destacar ao BNG como unha "forza política seria" e "traballadora", que ten "as mans libres" para "defender" aos galegos en Madrid. "Estamos a crecer, o 28 de abril quedamos ás portas, faltaron moi poucos votos de obter representación", lembrou.

O Bloque presentarase aos comicios nun pacto con CXG e integrando a membros desta formación nas súas listas e, tras a renuncia de En Marea e de Anova a concorrer, convértese na única candidatura que se presenta soamente na Comunidade galega.

A portavoz nacional do BNG, Ana Pontón, nunha rolda de prensa no Parlamento de Galicia.
A portavoz nacional do BNG, Ana Pontón, nunha rolda de prensa no Parlamento de Galicia. | Fonte: Europa Press

ALIANZAS

Sobre se para comicios como as galegas do 2020 repetirase esta tendencia a acumular apoios nacionalistas, Pontón respondeu que traballan "con man tendida a todas as persoas que queiran sumar por Galicia", pero non concretou se iso se trasladará a futuras alianzas.

De feito, sobre se se estudou a incorporación de Anova, corrente que en 2012 se desligou do BNG, na candidatura ás xerais, valorou que ese espazo político "móvese noutras coordenadas" e acode aos comicios --como xa fixo en 2015 e 2016-- "en alianzas con forzas estatais" como Podemos e Esquerda Unida (EU).

"E o que vimos é que as forzas estatais, as novas e as vellas, compórtanse como dúas pingas de auga cando se trata de Galicia e danlle as costas ao país", criticou, á vez que lembrou que precisamente Podemos e EU "pactaron" co Goberno de Pedro Sánchez "os peores investimentos" para a Comunidade galega "en 20 anos" co proxecto errado de Orzamentos Xerais do 2019.

FINANCIAMENTO AUTONÓMICO

Noutra orde de cousas, Ana Pontón volveu a reclamar á Xunta que utilice a vía xudicial para reclamar á Administración xeral do Estado os 700 millóns de euros que lle reclama por diferentes conceptos --esta semana o Goberno en funcións desbloqueou só 330 millóns correspondentes ás entregas a conta--.

No plano industrial, tras coñecerse o peche previsto para 2020 da central de Endesa nas Pontes (A Coruña), Ana Pontón censurou a actuación tanto da Xunta como do Goberno estatal: "Non pode ser que saibamos desde hai anos que hai unhas directivas europeas que falan dunha transición enerxética e dunha descarbonización da economía e que aquí non se tivese feito absolutamente nada".

A portavoz nacional do Bloque tamén aproveitou este asunto para defender a tarifa eléctrica galega que reclama a súa formación, xa que Galicia é unha "grande produtora de enerxía". E é que, tal e como explicou, a factura da Comunidade serve para pagar "os custos do transporte eléctrico" a Madrid. Así mesmo, pediu que se "cuestione" dunha vez que un sector produtivo que é "clave" tamén para a industria estea "privatizado".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 4 comentarios

3 Eleazar

A única opción de voto nacionalista galego é o BNG. Quen queira votar en contra dos intereses de Galiza ten unha ampla oferta españolista.

2 Os socios do psoe

Os socios do PSOE. Duros na oposición mansiiiiiños nos gobernos. PSOE 2

1 Breijar

Discurso baleiro e repetitivo alicerzado en falsidades, oportunismo baseado en crises alleas, pactar coa dereita galeguista nun momento de precariedade das clases populares, excesiva confianza no apoio dos medios de comunicación do réxime... todo é pan para hoxe e fame para mañá, o tiro pode sairlles pola culata e o sorriso converterse en pranto.

1 Alienao

Uhhhh quere meeeedo!!!!