Alcalde de Ourense: "A ver si tenemos un poco de educación, carallo; dije una palabra gallega, ¿no queréis que hable gallego?"
Gonzalo Pérez Jácome volve facer chanzas á conta da lingua propia de Galicia.
Por Galicia Confidencial | Ourense | 28/10/2019 | Actualizada ás 12:06
De todos é coñecido que o alcalde de Ourense, Gonzalo Pérez Jácome, non é amigo da lingua galega, que acostuma desprezar co seu habitual estilo bufo. No último pleno da pasada semana, volveu regalar outro episodio das súas xa acostumadas sobreactuacións esperpénticas.
No pleno do pasado venres, Jácome amoestou a dous edís da oposición chamándolles á orde, incluído o líder da oposición, o socialista Rafael Rodríguez Villarino.
Tras chamarlles a atención, o alcalde espetou: "A ver si tenemos un poco de educación, carallo", o que provocou as chanzas de varios concelleiros desde a bancada.
Ante as risas dalgúns, Jácome proseguiu: "Dije una palabra gallega. ¿No queréis que hable gallego?".
A sorna de Jácome sobre a lingua galega non é nada novo. Recentemente, durante o pregón das festas de San Francisco, incluíu no seu discurso: "Vamos a hablar en español, que se entiende mejor que el gallego. Esto es para los del Bloque, por si me están escuchando".
