Reclaman que Xunta asuma a xestión pública dos comedores de 'A Galiña Azul' despois das intoxicacións

Os casos reiterados de intoxicacións leves nos menús de diversas escolas infantís da rede 'A Galiña Azul' sacou de novo á palestra o debate sobre o modelo de xestión das cociñas e comedores de gardarías e centros escolares. Ao mesmo tempo, entidades sociais e políticas esixen ao Goberno galego axilidade na investigación para aclarar os casos rexistrados en Galicia entre este mes e o pasado outubro.

A CIG considerou que estas novas afeccións evidencian de novo "o risco" que sofren os pequenos cos servizos de 'catering' nas gardarías no canto de contar con persoal propio e un servizo xestionado pola Administración pública, co sistema de control sanitario da Xunta.

O sindicato criticou que, unha vez se vende este servizo a empresas de xestión, elimínase "a presión inspectora" sobre unhas firmas que buscan "o máximo beneficio", aínda á conta da "saúde dos usuarios", mentres que o sistema público representa unha garantía para as familias.

Nesta liña, CC.OO. denunciou que o actual provedor dos centros afectados, Airas Nunes Catering, é unha das marcas de Chico Freire S.L., cuxa xestión "xa foi cuestionada noutras ocasións sen que se tomasen medidas".

Así, a organización sindical esixiu que se abra un expediente sancionador contra a empresa provedora "por afectación grave e reiterada" contra a saúde da poboación máis vulnerable e insistiu, á súa vez, na a importancia de que as cociñas das gardarías pasen ao sistema público "de xestión directa"

COMERCIO DE PROXIMIDADE

A empresa de catering que xestiona os comedores nos que se produciron as reaccións alérxicas estará obrigada a cambiar de provedores dos produtos do menú e acudir a establecementos de proximidade de cada centro.

A medida, adoptada pola Xunta a través do Consorcio Galego de Servizos en Igualdade e Benestar, entrará en vigor de maneira indefinida a partir deste xoves e afectará a todas as gardarías nas que a empresa Chico Freire SL xestiona o comedor escolar.

Precisamente, En Marea solicitará no Parlamento de Galicia que todos os comedores se fornezan dos mercados locais para mellorar a calidade da alimentación dos escolares, e previr situacións como as rexistradas nas últimas semanas.

A conselleira de Política Social, Fabiola García, visita unha escola infantil.. XUNTA - Arquivo | Fonte: Europa Press