Así afecta o actual mercado de traballo á natalidade
O sociólogo Antonio Izquierdo asegura que "a economía é a que condiciona a demografía, e non ao revés".
- Galicia rexistra unhas 8.000 mortes máis que nacementos, as peores cifras vexetativas en España
- O mapa da hecatombe demográfica de Galicia: así avanzamos cara a desertización
Por E.P. | SANTIAGO DE COMPOSTELA | 11/12/2019 | Actualizada ás 20:05
A "cultura da temporalidade" laboral e a "fraxilidade" das políticas de conciliación inciden na baixa natalidade en España, segundo o experto en demografía e catedrático de Socioloxía na Universidade da Coruña, Antonio Izquierdo.
En declaracións a Europa Press, Izquierdo atribúe á situación económica do país o descenso de nacementos rexistrado en España na primeira metade deste ano, un total de 170.074, un 6,2% menos que no mesmo período do ano pasado, a cifra máis baixa desde 1941, cando comezaron a rexistrarse estes datos.
Os datos da Estatística do Movemento da Poblaciónpublicada este mércores polo Instituto Nacional de Estatística (INE) confirman un descenso por décimo ano consecutivo, unha tendencia á baixa só interrompida en 2014.
"Non é algo distinto á tendencia que seguimos desde hai moitos anos, e que é xeneralizada na Unión Europea, onde hai moitísimas décadas que o crecemento de poboación non é por saldo vexetativo senón por saldo migratorio", explica Izquierdo, aínda que subliña que a fecundidade en países do sur de Europa como España é aínda máis baixa, "situada por baixo da taxa de substitución".
"A economía é a que condiciona a demografía, e non ao revés", sentencia o catedrático de Socioloxía, e sinala o feito de que os países do norte de Europa teñan unha media de "medio fillo máis que nós" como mostra da incidencia do mercado de traballo na decisión de ter fillos.
"Os seus mercados de traballo son moi dinámicos: perdes o emprego e en poucas semana atopas outro", afirma este experto, fronte ao mercado laboral "con moito desemprego, de traballos laborais ou de tempo parcial de forma involuntaria" de España.
"Basta con salarios dignos e seguridade laboral para que aumente a fecundidade", asegura Izquierdo, que sinala tamén as "políticas fráxiles de conciliación" como un lastre para a natalidade do país. Tamén a falta de implantación de políticas de igualdade dentro das empresas.
