Feijóo garante que o paridoiro de Verín abrirá "en 24 horas" se hai pediatras e o visto e prace dos profesionais

O presidente da Xunta, Alberto Núñez Feijóo, garantiu este luns que o paridoiro do Hospital de Verín abrirá "en 24 horas" no momento en que haxa pediatras para atender aos recén nados e se conte co "visto e prace" dos profesionais da área na materia.

As matronas protestan contra do peche do paritorio de Verín.

Durante un acto celebrado este luns en Ourense, dixo aos veciños de Verín que o Goberno galego "quere abrir ese paridoiro", pero que se tivo que "suspender" a actividade porque "non hai pediatras para os nenos que nacen nese paridoiro".

"Imos seguir o ditame médico", dixo Núñez Feijóo, que garantiu que, no momento no que haxa pediatras e se conte co "visto e prace" dos profesionais, "ese paridoiro ábrese en 24 horas".

"Se non hai pediatras, abrilo sería tanto como dicirlle ás mulleres que poden ir parir a Verín, pero que aos seus nenos non os imos atender no momento do parto", indicou Feijóo, que indicou que sería unha "irresponsabilidade" que tamén "se pode considerar un delito".

O presidente galego asegurou que a falta de pediatras no Hospital de Verín non obedece a que "non se previu" esa necesidade. "Desde o mes de xuño estamos a tentar sacar prazas para conseguir pediatras no Hospital de Verín", dixo Feijóo, lembrando que as dúas prazas de xuño quedaron "desertas" e que foron sacadas de novo este mes de decembro. "Eu espero que se cubran", engadiu.

Núñez Feijóo lembrou que, ademais do servizo de partos para o coidado da nai, é necesario "dar seguridade tamén aos nenos", coa asistencia pediátrica. "Estou convencido de que en canto os teñamos, reporemos ese servizo", finalizou.