Por Europa Press / Redacción | SANTIAGO DE COMPOSTELA | 03/01/2020 | Actualizada ás 15:39
O secretario xeral do PPdeG, Miguel Tellado, afirmou que "o propósito" do Executivo autonómico que lidera Alberto Núñez Feijóo é esgotar a lexislatura e convocar as eleccións "cando toca", é dicir, no outono de 2020.
Ante o arranque do ano electoral, Tellado manifestou que "a Galicia do 2020 só ten tres días de vida pero xa mellora á do 2019" porque "debuta" con "máis dereitos sociais, máis emprego e menos impostos" grazas, segundo o popular, á entrada en vigor dos orzamentos da Xunta para este ano.
Neste sentido, indicou que o obxectivo é facer de Galicia "unha illa de estabilidade" fronte á situación do Estado, pois considera que España "seguirá sendo un país inestable politicamente e sen credibilidade internacional".
Así, tras apuntar que o posible novo goberno no Estado encabezado polo socialista Pedro Sánchez pode "castigar a Galicia" como "xa fixo" cos orzamentos para 2019 que non saíron adiante, Miguel Tellado incidiu en que "aínda que 2020 é un ano electoral, é un ano para gobernar".
Por iso, subliñou que o obxectivo do Executivo galego é "gobernar ata o último día" e "facer unha campaña que dure só 15 días" na que "presentar un novo proxecto renovado e con incorporacións" para o próximos catro anos.
ESGOTAR A LEXISLATURA
Despois de que o Goberno galego activase a maquinaria para a celebración das eleccións coa convocatoria dos concursos para planificar e organizar a cita coas urnas, Tellado quixo restar "transcendencia" a este feito "porque non indica nada" e encádrao no cumprimento da Lei de Contratos por parte do Goberno.
Así as cousas e como xa expresou o presidente galego, Alberto Núñez Feijóo, nunha entrevista con Europa Press a finais de decembro, "o propósito é finalizar a lexislatura" porque, segundo Tellado, ese é "o maior signo de estabilidade e normal funcionamento" para a comunidade: "que se celebren cando toca".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.