Unha edición facsimilar recupera o 'Estudo sobre emigración' de Eduardo Vicenti de principios do século XX

O Consello da Cultura Galega e a Secretaría Xeral da Emigración reeditaron, en formato facsimilar, a obra de Eduardo Vicenti 'Estudo sobre emigración', un libro "innovador" e en "formato atípico" que daba informacións útiles ás persoas que decidían emigrar a inicios do século XX.

A presidenta do CCG, Rosario Álvarez, e o secretario xeral da Emigración, Antonio Rodríguez Miranda, participaron este venres na presentación desta publicación, incluída na colección 'Clásicos da Emigración'.

Nesta obra, Eduardo Vicenti ofrece información detallada sobre o proceso de emigración a inicios do século XX, desde as condicións da viaxe ata as leis de países de acollida, pasando polas casas consignatarias ou as compañías existentes para facer os traxectos.

Así mesmo, ofrece unha visión da emigración "libre de tópicos", explican os seus responsables, e centrada nas evidencias documentais e nos contextos internacionais.

Eduardo Vicenti foi un destacado político galego da Restauración decimonónica, preocupado polo desenvolvemento da educación e pola necesidade constante de melloras corporativas e profesionais para o Maxisterio. Así mesmo, foi un importante publicista.