O pianista James Rhodes volve usar o galego, desta vez para enxalzar a Benedicta Sánchez polo seu Goya

"Isto é tan bonito. Escribe un libro nos 60. Actúa aos 80. Aprende o piano aos 45 anos. Quen sabe que vida nos traerá...". Esta foi a mensaxe, en galego, que publicou en Twitter o pianista británico James Rhodes, logo de coñecerse o Goya á mellor actriz revelación, que recolleu a galega Benedicta Sánchez, unha novel inexperta que abraiou polo seu papel no filme 'O que arde', de Oliver Laxe.

Rhodes compartiu a nova desde a súa conta en Twitter e recibiu o aplauso e felicitacións de moitos pola súa mensaxe e por usar a lingua galega.

Isto é tan bonito. Escribe un libro nos 60. Actúa aos 80. Aprende o piano aos 45 anos. Quen sabe que vida nos traerá...https://t.co/1MB1XNz0Jc pic.twitter.com/HrwyohiqoL

— James Rhodes (@JRhodesPianist) January 26, 2020

Esta non é a primeira vez que o célebre pianista de orixe británica, residente en España, usa o galego e defende o seu uso. O 6 de xullo de 2018 publicou o seu primeiro chío na lingua propia de Galicia. Naquel, dicía: "Este é o meu primeiro tuit en galego. Espero que non sexa un desastre. Encántame estar aquí e quería dicilo. Especialmente a comida Que teñades un fermoso día".