A Xunta pide en Bruxelas que a PAC inclúa "as especificidades" galegas

O conselleiro do Medio Rural, José González, participou este luns no Consello de Ministros de Agricultura da UE, en representación das comunidades autónomas españolas, un foro no que evidenciou o seu apoio a que exista unha Política Agraria Común (PAC) para toda Europa, pero que inclúa "as especificidades" do agro galego.

González, que acudiu acompañando ao ministro Luís Planas, ratificou que as posicións a nivel nacional están "consensuadas" e garantiu a "lealdade institucional" ao Goberno estatal, aínda que tendo en conta "a defensa dos intereses" dos agricultores galegos.

Con iso, reclamou que se teñan en conta "as especificidades" das explotacións galegas e apostou por "loitar e defender o carácter redistributivo das axudas" e que os seus pagos sexan obrigatorios e non de aplicación voluntaria. "Supón beneficiar o máximo posible ás pequenas explotacións, que son as nosas", resolveu.

DESENVOLVEMENTO RURAL

O conselleiro tamén reiterou a aposta da Xunta por unha prórroga do Programa de Desenvolvemento Rural 2014-2020 para o ano 2021, como medida para "garantir a continuidade de todas as liñas de axuda que ampara este programa" mentres se termina a negociación do próximo plan, 2021-2027, que vai "algo atrasada".

En todo caso, José González explicou que os informes e os datos do ministerio son "tranquilizadores" neste ámbito, e apuntan a que, efectivamente "se poderían utilizar fondos do anterior período".

Outro dos temas que se analizarán este luns é o pacto verde europeo, sobre o que González dixo que "os maiores defensores do medio ambiente no rural galego son os agricultores, gandeiros e silvicultores", polo que "se ten que contar con eles nese avance cara á sustentabilidade ambiental".

Neste ámbito, o conselleiro explicou que o "avance" en sustentabilidade ambiental "tense que facer con financiamento" europeo e debe "ir da man" coa "sustentabilidade social e económica".

BENESTAR ANIMAL

Por outra banda, en relación á posible aprobación dunha marca europea de benestar animal, o conselleiro ha afimado que o sector galego estaría "encantado", dado que os gandeiros da comunidade "son referentes en benestar animal".

Do mesmo xeito, considerou un "primeiro paso" a proposta europea de indicar na etiquetaxe a procedencia do mel, aínda que afirmou que queda "algo curta". Con iso, reclamou que poida reflectirse na etiquetaxe non só a procedencia, se non "a porcentaxe que corresponde a cada país".

José González participa no Consello de Ministros de Agricultura da UE.. XUNTA | Fonte: Europa Press