O Goberno reitera que non devolverá os 2.500 millóns do IVE de 2017 ás CCAA e di que esa cantidade "non existe"

A ministra de Facenda, María Jesús Montero, afirmou este martes que a non devolución dos 2.500 millóns de euros do IVE autonómico de 2017 ás comunidades —200 millóns no caso de Galicia— débese ao bloqueo do PP ao proxecto de Orzamentos de 2019 que corrixía o cambio normativo aprobado polo exministro Cristóbal Montoro, e aclarou que o Executivo non queda ese montante, xa que "non existe" ao producirse o axuste en termos de Contabilidade Nacional hai dous anos.

Montero subliñou que o exministro do PP Cristóbal Montoro actuou con "nocturnidade" ao realizar unha modificación "unilateral" do Sistema Inmediato de Información (SII) do IVE que propiciou na práctica que só se recadasen a efectos das comunidades autónomas 11 meses do IVE.

Montero lembrou que o Goberno de Pedro Sánchez tentou na pasada lexislatura rectificar esa formulación, nun contexto no que o modelo de financiamento autonómico prevé a liquidación do IVE aos dous anos, polo que a solución tiña que producirse o ano pasado.

Por ese motivo, o Goberno socialista levou ao Congreso un proxecto de lei de orzamentos que corrixía ese desfasamento do IVE "provocado por Montoro". Con todo, o rexeitamento do PP aos Orzamentos impediu que vise a luz.

"Os responsables de que non se puido corrixir a desviación con motivo da actuación de Montoro son as forzas políticas que votaron en contra do instrumento que permitía corrixilo, entre elas o PP", denunciou Montero, quen dixo non entender que se reproche ao Executivo de Sánchez "aquilo que non se lle permite facer".

POSTURA "INCONGRUENTE" DO PP

A tamén portavoz do Goberno remarcou que a situación podería parecer un "chiste" de non ser porque é unha cuestión que "non ten ningún tipo de graza", e insistiu en pór de manifesto o que ao seu xuízo é unha actitude "incoherente e incongruente" por parte do PP ao bloquear os orzamentos e logo pedir contas ao Goberno por non abonar o IVE.

En calquera caso, quixo aclarar que "non existen 2.500 millóns que quede o Goberno de España", e cuestionou se determinadas expresións sobre o asunto por parte de distintos presidentes autonómicos son oportunas ao ir en liña cos argumentos de "o Estado róubanos" e expresións que "soan a outras cuestións", como o desafío independentista.

Por iso, pediu ser "medidos na linguaxe" e negou con "absoluta rotundidade" que haxa 2.500 millóns que non se vaian a traspassar, xa que "o axuste en termos de Contabilidade Nacional e de déficit fíxose en 2017".

Por iso, explicou, nese ano acometeuse o axuste por parte do exministro Montoro, e aínda que posteriormente o Executivo de Sánchez tentou que as CCAA non se visen obrigadas a ter que devolver a liquidación en 2019 mediante unha solución recollida nos orzamentos, non puido ver a luz polo 'non' ás novas contas públicas do PP e outras formacións.

"Ninguén queda con ningún diñeiro porque non hai ningún diñeiro sobrante. Hai unha contabilización do que se produciu no sistema e unha contabilización que xa se aplicou en 2019", agregou.

QUEIXAS DE PRESIDENTES AUTONÓMICOS, INCLUÍDO FEIJÓO

Nas últimas semanas varios presidentes autonómicos de rexións gobernadas polo PP e algúns de CCAA do PSOE, como o de Castela-A Mancha, Emiliano García-Page, reclamaron o pago pendente e ameazaron con recorrer aos tribunais se non se resolve o asunto.

No caso de Galicia, a Xunta cifra en 200 millóns a débeda do Goberno por este concepto e o seu presidente, Alberto Núñez Feijóo, censurou nos últimos días o "furto" que, ao seu xuízo, está a realizar o Ministerio de Facenda.

O asunto do IVE autonómico remítese ao ano 2017, cando o por entón ministro de Facenda do Goberno do PP, Cristóbal Montoro, levou a cabo un cambio normativo co que se obrigou a informar do IVE ás grandes empresas en tempo case real e permitiu que o tributo se pagase o día 30 de cada mes no canto do 20 como viña facendo.

O cambio normativo provocou que a recadación do IVE que se ingresaba en decembro de 2017 se trasladase en termos de caixa a xaneiro do ano seguinte, 2018.

Desta forma, a liquidación do exercicio 2017, que se realizou aos dous anos, en 2019, foi só de once meses, faltando por tanto o abono dunha mensualidade.