Satse esixe que enfermeiras recuperen a compensación por traballar festivos

O Sindicato de Enfermaría (Satse) esixe que as profesionais de enfermaría "recuperen a compensación de descansos" por traballar domingos e festivos, recollido no artigo 19 do convenio colectivo único para o persoal laboral da Xunta de Galicia, e que quedou temporalmente suspendido con motivo da crise económica.

"Por entón, a Xunta alegaba como causas, por medio dunha lei de medidas temporais para estes profesionais, a profunda crise económica e o obxectivo de buscar a estabilidade orzamentaria", sinala Satse nun comunicado.

Para este sindicato, esas causas "afortunadamente están superadas", polo que, "tras superarse as dificultades que no seu día xustificaron as medidas, e en aras de restablecer o equilibrio económico e laboral perdido, o Sindicato de Enfermaría en Galicia reclama que a Xunta reabra as canles de negociación necesarios para reverter esta situación", abunda.

Para Satse a situación destes profesionais de enfermaría "é de xeito evidente inxusta e inxustificada a día de hoxe, xa que ven privados, desde fai xa máis de oito anos, polos drásticos recortes nos seus dereitos laborais e condicións económicas na prestación dos seus servizos", denuncia.

SATSE e ANPE piden enfermeiras escolares en Galicia