Por E.P. | SANTIAGO DE COMPOSTELA | 06/03/2020 | Actualizada ás 18:49
A Deputación de Pontevedra celebrou este venres no Pazo Provincial o acto central do Día Internacional da Muller, enmarcado na ampla programación de actividades baixo a lema 'Por nós, por todas'. O vestíbulo do Pazo, iluminado de cor morada, acolleu unha acción que mesturou arte, reivindicación, palabra e igualdade, con reivindicación de "mulleres poderosas e libres e da sororidade contra os negacionistas", destaca a presidenta da Deputación, Carmela Silva.
Os actos deron comezo co despregamento dunha lona co lema da Deputación para este 8M na fachada principal do Pazo Provincial de Pontevedra. A continuación, o vestíbulo do edificio presentou a acción artística chamada 'A fortaleza do compromiso', da creadora Irene Silva, consistente nunha alfombra floral feita en colaboración das mulleres alfombristas de Bueu e un "muro" de douscentos paraugas de cor violeta con cen palabras que falan de: "O que as mulleres queremos que nos defina".
A este acto asistiron representantes de colectivos e asociacións de mulleres da provincia. "Non hai nin un só xesto feminista que teña que ver coa violencia", dixo emocionada Carmela Silva.
"A igualdade ante a lei é o primeiro capítulo no credo feminista", proclamou a presidenta recollendo as palabras escritas en 1917 por María Vinyals. "Ela xa defendía, no século XIX, a emancipación absoluta, a eliminación da prostitución, o sufraxio feminino ou a educación da muller", engadiu.
No seu discurso, a presidenta insistiu en que "xuntas somos máis fortes, que ninguén nos debilite". "Xuntas faremos o camiño máis rápido porque a igualdade é o dereito fundamental do mundo. Polas mulleres, imos seguir loitando todos os días do ano e o 8 de marzo é a nosa referencia", concluíu.
Despois do acto institucional, tanto a presidenta da Deputación como os deputados do goberno provincial, participarán ao longo desta fin de semana en diversas actividades e actos reivindicativos pola igualdade con motivo do Día da Muller, entre eles, os do Foro Universo Muller en Pontevedra; a mostra das federacións deportivas; ou a carreira pola igualdade do domingo á que asistirá Carmela Silva e na que a Deputación fará unha repartición de camisetas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.