G. Caballero comprométese a implantar un plan integral de apoio ao sector primario con máis de 40 medidas
Denuncia que o goberno de Feijóo perdeu 55 millóns de axudas europeas.
Por E.P. | SANTIAGO DE COMPOSTELA | 10/03/2020 | Actualizada ás 14:25
O candidato do PSdeG á Presidencia da Xunta, Gonzalo Caballero, comprometeuse este martes a elaborar un plan integral de apoio ao sector primario con máis de 40 medidas que abrirán un "novo escenario" no medio rural tras as eleccións autonómicas do 5 de abril.
Nunha visita á Estrada (Pontevedra), o tamén secretario xeral do PSdeG apostou por converter o banco de terras nun "instrumento efectivo" que permita que "a terra estea a disposición de quen necesita traballala".
Así mesmo, avogou por pór en marcha un plan de explotación de actividades agrícolas e gandeiras para aquelas explotacións que non teñen garantido a substitución xeracional e considerou "fundamental" pór en marcha instrumentos de supervisión para que o prezo do leite cubra os custos de produción.
Gonzalo Caballero considerou necesario tomar estas medidas tras 11 anos de goberno de Alberto Núñez Feijóo nos que "o medio rural estivo abandonado, sen medidas, sen proxección".
FEIJÓO, "UN MAL XESTOR"
E é que, segundo indicou, ao longo da súa etapa á fronte da Presidencia da Xunta, foi "un mal xestor" sen compromiso co rural. "Nos gobernos de Feijóo perdéronse 55 millóns de euros de fondos europeos que tiveron que ser devoltos porque non tivo a capacidade de xestionalos para dirixilos aos gandeiros e aos agricultores galegos", apuntou.
"Por esa falta de xestión, esa falta de compromiso con Galicia, eses 55 millóns que houbo que rexeitar, Feijóo merece un castigo severo de toda Galicia e dos sectores agrícolas, dos sectores gandeiros e primarios", indicou.
