Greenalia abre en Curtis a segunda planta de biomasa máis grande do Estado
A empresa asegura que xerará unhas vendas anuais de 37 millóns con 500.000 toneladas de restos de corta forestal que se recollerán en bosques certificados nun radio de 100 quilómetros ao redor das instalacións.
Por Europa Press / Redacción | SANTIAGO DE COMPOSTELA | 10/03/2020 | Actualizada ás 19:22
Greenalia puxo en marcha en Teixeiro, no municipio coruñés de Curtis, unha planta de biomasa forestal cunha potencia de 50 megawatts tras un investimento de 135 millóns de euros.
Segundo informa a compañía nun comunicado, Greenalia activa a que é a segunda planta de biomasa máis grande de España, pero "a primeira en tecnoloxía" e "máis importante do sur de Europa".
Estima que o seu funcionamento xerará unhas vendas anuais de 37 millóns de euros, cuns ingresos recorrentes de máis de 1.000 millóns de euros ao longo de 25 anos pola venda de enerxía eléctrica e de 340 millóns pola subministración de biomasa forestal para Greenalia Forest, filial do grupo.
A compañía produtora de enerxía renovable obtivo o Rexistro de Instalacións de Produción en Réxime Especial definitivo e solicitou a inscrición "un mes antes do previsto", polo que, desde o 1 de marzo, a enerxía producida está a vender ao prezo outorgado na poxa celebrada en 2016.
UN CENTENAR DE EMPREGOS FIXOS
Durante o proceso de construción, Greenalia indica que se xeraron máis de 1.000 postos de traballo entre empregos directos e indirectos. Deles, uns 100 manteranse como fixos, 35 na planta e o resto na actividade de recollida da biomasa.
Ten capacidade para tratar 500.000 toneladas de restos de corta forestal que se recollerán en bosques certificados nun radio de 100 quilómetros ao redor das instalacións.
A planta de biomasa de Curtis é o segundo proxecto de xeración de enerxía renovable de Greenalia. A este súmase o parque eólico de Miñón e seguiranlle o resto dos parques eólicos e fotovoltaicos recollidos dentro do seu plan estratéxico, co que prevé ter 1GW de potencia instalada en 2023
