Produtores pesqueiros urxen ao Goberno medidas ante a deterioración da frota e o risco de desaparición do sector

Tres organizadores de produtores do sector da pesca, a Organización de Produtores de Buques Conxeladores de Merlúcidos, Cefalópodos e Especies Varias (OPPC-3), a Organización de Produtores Nacional de Palangre de Altura (OPNAPA) e a Organización de Produtores de Pesca Fresca do Porto de Vigo (OPPF-4) remitiron á carta ao Ministro de Agricultura, Pesca e Alimentación, Luís Planas, na que urxen medidas para evitar a deterioración da frota de altura e gran altura, e o risco de "desaparición progresiva" do sector.

Na misiva reclaman medidas urxentes no escenario dun gradual aumento dos custos operativos, falta de renovación de buques e desvantaxe fiscal que sofren os tripulantes españois fronte aos seus homólogos doutros países europeos e extracomunitarios. Entre as propostas presentadas, destacan a creación urxente dun Rexistro Especial para a Frota de Altura e Gran Altura, que permita establecer "un marco xurídico, fiscal e laboral adaptado á realidade operativa destas unidades".

Así mesmo, exponse a posta en marcha dun Plan Integral de Rescate e Modernización do Sector Pesqueiro que contemple, ademais do citado Rexistro Especial, medidas como incentivos fiscais e laborais para as tripulacións, renovación e modernización tecnolóxica da frota, políticas activas de formación e substitución xeracional, ou recuperación do consumo de produtos do mar nos fogares.

Tamén reclaman un reforzo dos controis sobre importacións pesqueiras, e a "defensa firme dos intereses pesqueiros de España na UE". As organizacións asinantes apuntaron que a pesca "non é só unha actividade económica, senón un sector estratéxico para a soberanía alimentaria, a industria transformadora e a cohesión das comunidades costeiras".

Un barco pesqueiro chega ao Porto de Burela, a 21 de decembro de 2022 | Fonte: Carlos Castro - Arquivo