Por Europa Press / Redacción | SANTIAGO DE COMPOSTELA | 25/03/2020 | Actualizada ás 15:46
A morte dun home de 81 anos de idade que estaba ingresado no Complexo Hospitalario Universitario da Coruña (Chuac) eleva a 32 as vítimas mortais relacionadas coa epidemia de coronavirus en Galicia.
As autoridades sanitarias informan de que esta última vítima mortal fora diagnosticada de coronavirus e tiña patoloxías crónicas previas.
Este mércores faleceron outros catro homes, un deles sen patoloxías previas destacadas, que tiña 84 anos de idade e estaba ingresado no Hospital Virxe da Xunqueira, do municipio coruñés de Cee.
Ademais, morreron dous homes de 82 anos de idade ambos e que estaban ingresados no Complexo Hospitalario Universitario da Coruña (Chuac) e outro home de 74 que era atendido no Hospital Montecelo de Pontevedra.
XORNADA DO MARTES
A xornada do martes foi na que se rexistraron ata o momento máis vítimas mortais en Galicia en relación á pandemia de coronavirus, coa morte de cinco homes e dúas mulleres, todos eles con patoloxías previas.
En concreto, o martes faleceron dous homes de 61 e 92 anos de idade e unha muller de 83 que estaban ingresados no Chuac; un home de 78 anos que permanecía no Hospital Lucus Augusti de Lugo; outro home de 90 que era asistido no Complexo Hospitalario de Ourense (Chuo); unha muller de 91 anos de idade que estaba ingresada no Complexo Hospitalario Universitario de Ferrol (Chuf) e un home de 83 anos que estaba ingresado no Hospital da Costa, no municipio lucense de Burela.
A xornada do luns morreron dous homes en relación á pandemia de COVID-19: un de 69 anos de idade que estaba ingresado no Complexo Hospitalario Universitario de Ferrol e outro de 81 anos de idade que estaba ingresado no Hospital Lucus Augusti de Lugo. Ambos presentaban tamén patoloxías previas.
VÍTIMAS DA SEMANA PASADA
Durante a xornada do domingo faleceron en Galicia cinco persoas en relación á epidemia de coronavirus, entre elas dúas mulleres de 92 e 77 anos de idade na área de Ferrol, a primeira ingresada no Chuf e a segunda no Hospital Juan Cardona. Ambas tamén presentaban patoloxías previas.
Tamén faleceron durante a xornada do domingo outro tres persoas: unha muller de 90 anos que estaba hospitalizada no Complexo Hospitalario Universitario de Ourense (Chuo), un home de 72 anos que se atopaba no Hospital Quironsalud Miguel Domínguez de Pontevedra e unha muller de 84 anos ingresada no Complexo Hospitalario Universitario de Santiago (Chus).
Pola súa banda, na xornada do sábado 21 de marzo rexistráronse catro mortes relacionadas coa pandemia: unha muller de 68 anos e tres homes de 93, 81 e 74 anos, respectivamente, todos eles ingresados no Chuac e con patoloxías crónicas previas.
Así mesmo, o venres rexistráronse catro falecidos: dous homes de 70 e 79 anos, respectivamente, tamén ingresados no Chuac; así como unha muller de 93 anos que estaba ingresada no Complexo Hospitalario de Ourense; e un home de 89 anos de idade que estaba no Hospital de Monforte (Lugo). Todos presentaban tamén varias patoloxías previas.
OUTRAS VÍTIMAS
O xoves coñeceuse o falecemento da quinta vítima mortal, un home de 75 anos que tamén estaba ingresado no Chuac e que presentaba varias patoloxías crónicas previas. Pola súa banda, a cuarta rexistrouse o mércores 18 de marzo, xornada na que faleceu un home de 72 anos tamén ingresado na Coruña.
Previamente, a terceira vítima mortal en Galicia foi un home de 45 anos de idade que contaba, así mesmo, con patoloxías previas e que tamén estaba ingresado no Chuac.
Antes faleceu un home de 81 anos con varias patoloxías, ingresado no Hospital Montecelo de Pontevedra, mentres que a primeira morte en Galicia foi a dunha muller de 92 anos, con múltiples patoloxías previas, que estaba ingresada no centro de Povisa, en Vigo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.