Masiva manifestación en Santiago
Ducia de miles de persoas ateigan o centro nunha protesta pacífica, ordenada e se cadra a máis numerosa na historia da cidade. Escolma de imaxes e vídeos da protesta no interior.
Por Walter Burns | Santiago | 14/11/2012 | Actualizada ás 14:30
Dar unha cifra concreta de asistentes á protesta do 14N en Santiago de Compostela é absurdo. Resulta imposíbel atinar no número de persoas asistentes, dado o masivo éxito da manifestación.
Varias ducias de miles de cidadáns colapsaron o centro da capital de Galicia. Case todos os comercios estaban pechados, malia que había algúns, os menos, nos que se percibía actividade no interior. Abrirán unha vez que remate a marcha. Nas aforas da cidade o seguimento era menor que no centro, pero maior que na folga de primavera.
Máis de tres horas de comezada a protesta aínda hai xente nas rúas de Compostela. Unicamente a maior da manifestacións de Nunca Máis pode compararse. Entre os cidadáns podían destinguirse estudantes Erasmus de lugares como China.
A diferencia coas manifestacións co Prestige, o ambiente reivindicativo foi menor. Sen incidentes e aproveitando un tempo moi agradábel, miles de persoas de todas as idades marcharon pacificamente e a maior parte do tempo en silencio. Houbo tamén, iso si, cánticos contra o presidente da Xunta:
Ante o novo éxito da convocatoria unitaria, os sindicatos desprazaron o final da Praza das Praterías á Quintana. Alí, valéndose dunha de novo insuficiente megafonía, reclamaron unha nova política económica que acabe cos recortes, os EREs, a reforma laboral e abra a porta ao crecemento económico.
Na manifestación víronse emblemas da práctica totalidade de sindicatos e organizacións de esquerdas do país. CIG, UXT, Comisións, CUT, CGT, CNT, STEG, Sindicato de Xornalistas, BNG, EU, PCPE, NóS-UP, Galiza Nova, Liga Estudiantil Galega forman unha lista imposíbel de completar polo volume da protesta.
Balance do 14N en Santiago
O seguimento da folga xeral en Santiago é moi importante, maior que nas pasadas convocatorias. Varias das grandes empresas do polígono están pechadas ou cunha actividade moi escasa. A zona vella ten case todos os comercios pechados, e no Ensanche cómpre agardar á tarde para valorar o impacto real da conovocatoria.
A nivel de incidentes, só destacar que varios medios relatan a detención dun piquete da CNT no Polígono do Tambre durante a madrugada. A Policía Nacional acúsao de agredir a un axente, versión que el nega. O sindicalista está arestora na Comisaría.
