Por Europa Press / Redacción | SANTIAGO DE COMPOSTELA | 23/04/2020 | Actualizada ás 15:46
O portavoz da coalición Galicia En Común-Anova Marea, Antón Gómez-Reino, advertiu que a atención primaria enfrontarase ao coronavirus en Galicia despois de "recortes do 21%" no seu orzamento durante os últimos anos.
Nunha rolda de prensa telemática ofrecida este xoves, Gómez-Reino lembrou que a atención primaria, como repiten as autoridades nos últimos días, será "clave no combate" do coronavirus nas próximas semanas, polo que instou á Consellería de Sanidade a reforzar un servizo que padeceu "recortes" nos últimos anos.
"O que antes eran a UCI e as emerxencias, agora serán os profesionais da atención primaria", incidiu o tamén deputado no Congreso, que subliñou que "as administracións públicas teñen que apoiar a estes profesionais, que levan en moitos casos anos traballando en condicións moi precarias, con contratos de días ou semanas e sen continuidade".
Por iso, demandou que a Consellería de Sanidade "dea certezas" aos traballadores de atención primaria e "consolide" os seus contratos. Ademais, Gómez-Reino considera que a elaboración do estudo epidemiolóxico deben levalo a cabo "os investigadores" e non os profesionais de atención primaria.
EDUCACIÓN
Por outra banda, preguntouse "que interese" tiña a Xunta en atrasar a suspensión das oposicións de educación, unha decisión anunciada pola conselleira do ramo, Carmen Pomar, o pasado mércores tras semanas de incerteza sobre a súa celebración.
Nunha rolda de prensa telemática celebrada este xoves, Gómez-Reino manifestou que "era de absoluto sentido común" que as oposicións fosen suspendidas, aínda que botou en falta que a Xunta convocase aos axentes sociais para acordar un novo calendario.
"Non entedemos que interese tivo a Xunta en demorar semanas o que o resto de goberno autonómicos xa fixera", incidiu o tamén deputado de Unidas Podemos, que destacou a "mobilización" dos opositores e os profesores para reclamar a suspensión do proceso.
Neste sentido, reclamou á Xunta de Galicia que consensúe a nova data para as oposicións, que, para En Común, deben "manter as prazas" ofertadas para esta convocatoria cancelada e, mesmo, "amplialas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.