O Gaiás acollerá a mostra 'Galicia, de Nós a nós' en outubro
A Xunta prevé que, tras o seu paso pola Cidade da Cultura, teña unha itinerancia completa na cidade de Ourense en febreiro de 2021.
Por E.P. | SANTIAGO DE COMPOSTELA | 02/06/2020 | Actualizada ás 16:50
O Museo Centro Gaiás acollerá o próximo mes de outubro 'Galicia, de Nós a nós', a segunda exposición do Xacobeo 21, reprogramada por mor da alerta sanitaria causada pola COVID-19, e que virará ao redor da Xeración Nós. Así llo trasladou o conselleiro de Cultura, Román Rodríguez, ás entidades participantes no Centenario da Xeración Nós, durante un encontro telemático para coordinar a celebración desta homenaxe.
A mostra, que sucederá á exposición 'Galicia, un relato non mundo', estaba prevista inicialmente para finais de maio, pero tivo que ser reprogramada polos efectos da crise sanitaria da COVID-19.
Trátase dunha exposición realizada pola Xunta en colaboración coa Deputación de Ourense, que está comisariada polo investigador e académico da Real Academia Galega (RAG) Afonso Vázquez Monxardín e pola profesora e investigadora da Universidade de Vigo Ana Acuña. A Xunta prevé que, tras o seu paso pola Cidade da Cultura, teña unha itinerancia completa na cidade de Ourense en febreiro de 2021.
A MOSTRA MÁIS COMPLETA SOBRE A XERACIÓN NÓS
Esta aspira a ser "a mostra máis completa realizada ata agora sobre a Xeración Nós", explicou o Goberno galego, co fin de difundir na sociedade a transcendencia do que, xunto ao Rexurdimento, "foi, probablemente, o momento histórico máis relevante de conformación da cultura e identidade galega".
A exposición reflectirá "o compromiso coa memoria e o legado" dunha xeración que agrupa os considerados "pais do galeguismo contemporáneo" e reivindicará "a vixencia de principios defendidos pola Xeración Nós", como a dimensión universal da cultura galega, a necesidade de ter unha voz propia no mundo e o carácter aberto e integrador de Galicia.
EXTENSIÓN DOS ACTOS CONMEMORATIVOS
Durante o encontro, as asociacións participantes mostráronse favorables á proposta do Goberno galego de prolongar a 2021 as actividades programadas para celebrar esta efeméride, prevista para 2020, dados os efectos da pandemia.
O obxectivo desta iniciativa é completar as actividades e cumprir cos obxectivos conmemorativos do centenario a través dunha programación diversa para homenaxear a intelectuais galeguistas como Vicente Risco, Castelao, Otero Pedrayo, Antón Losada Diéguez, Francisca Herrera Garrido e Florentino López Cuevillas, entre outros.
