Identificados os causantes de nove incendios forestais rexistrados en maio

A Policía Autonómica logrou identificar os causantes de nove lumes rexistrados durante o mes de maio nas provincias da Coruña e Pontevedra. En suma, 17 persoas foron detidas ou investigadas este ano como presuntos autoras de incendios forestais.

Este nove lumes producíronse por restos de queimas agrícolas ou forestais que se descontrolaron, nos municipios de Negreira, Ribeira, A Pobra do Caramiñal, Sobrado, Porto do Son, Outes e Pontevedra.

Tres deles rexistráronse o 18, 25 e 26 de maio, en Negreira, Ribeira e Pobra do Caramiñal, por queimas nas que non se tomaron as medidas de precaución adecuadas e que se saldaron con 2,4 hectáreas de superficie rasa afectadas.

Doutra banda, tres persoas foron identificadas como presuntos autores de incendios en Outes, Porto do Son e Negreira o 23, 27 e 28 de maio, respectivamente, que afectaron a 2.300 metros catros de raso.

Tamén se investigou a un home por un lume no lugar do Castelo, na parroquia de Lérez en Pontevedra, que afectou a 0,4 hectáreas arboradas.

Outro home foi investigado por un lume na parroquia de Grixalba, en Sobrado, o 25 de maio, que afectou 0,9 hectáreas de superficie rasa e 0,9 de arboredo tras unha queima sen autorización. Así mesmo, tomouse declaración a un home por un lume o 26 de maio en Baroña, en Porto do Son, no que arderon 0,2 hectáreas de raso.