Portátiles e conexión móbil gratis para garantir a equidade docente dos estudantes da USC

A USC dotou de equipamento informático e de conexión a servizos de rede a todo o alumnado que o solicitou por mor da crise do coronavirus. A través do Fondo Supera COVID-19, impulsado polo Banco Santander, CRUE e CSIC, a Universidade compostelá deseñou un proxecto co que dar resposta ao colectivo de estudantes que se atopan dentro da denominada fenda dixital coa intención de buscar solucións tecnolóxicas estandarizadas. 

“Fortalecer a actividade docente non presencial en condicións de equidade para todo o estudantado constituíu o obxectivo principal desta iniciativa da que o Fondo COVID-19 financiou o 90%, mentres que o resto cubriuse con recursos propios”, apunta a USC nun comunicado. Deste xeito, os mozos e mozas que o solicitaron teñen acceso ata o mes de xullo a 300 ordenadores portátiles, 150 dispositivos router con conexión a internet móbil 4G dotados de tarxeta SIM, 90 cámaras web e 500 plans de datos. 

Ademais, a USC cofinanciou o acceso á Rede do alumnado a través de tres convocatorias dotadas con 60.000 euros cada unha. A última delas, mantén aberto o prazo de presentación de solicitudes ata o vindeiro 19 de xuño. Polo de agora, preto de 2000 persoas téñense beneficiado xa desta iniciativa.

Por outra banda, a universidade santiaguesa informa que tamén acaba de presentar ante o Fondo un proxecto de Teleformación no Sistema Universitario Galego xunto coas universidades da Coruña e Vigo. Este proxecto aborda unha serie de actuacións orientadas a prolongar unha situación de docencia non presencial non só ata o final deste curso académico, senón que quere definir asemade accións que permitan preparar situacións de excepcionalidade no curso 2020-2021. As actuacións abarcan os eidos da ciberseguridade, teleformación e atención ao usuario.