A Policía de Ferrol libera unha egua preñada que levaba varios días atrapada nun cepo sen acceso a auga nin comida

Efectivos da Policía Local de Ferrol que realizaban labores de vixilancia en Porta de Neira liberaron a semana pasada a unha egua preñada que levaba "varios días" atrapada nun cepo "sen acceso a auga nin comida".

Segundo explicaron, foron os veciños da zona os que alertaron aos axentes de que nunha propiedade había unha egua preñada que "tiña un cepo nunha pata" e que se movía "con moita dificultade".

O animal, contaron, "non tiña acceso a alimento nin auga, e, ao parecer, levaba varios días nesa situación". Os policías procederon a liberar á egua e atárona nunha zona na que había herba.

Así mesmo, reclamaron a presenza de persoal do servizo de lacería, pero non foron capaces de identificar o propietario do animal a través do microchip que levaba implantado, polo que se abriu unha investigación para dar con el.

ANIMALISTAS APLAUDEN A INTERVENCIÓN

Tras ter coñecemento desta intervención, a Fundación Franz Weber emitiu un comunicado para aplaudir a intervención da Policía Local de Ferrol, á vez que aproveitaron para denunciar, unha vez máis, o uso deste tipo de dispositivos que dificultan a mobilidade dos cabalos, ocasionando problemas na circulación e "chegando mesmo á mutilación parcial das súas patas".

Aínda que a ONG iniciou unha en 2011 unha "intensa campaña" para pór fin a estas prácticas, aseguran que "a situación está moi lonxe de resolverse". Así, os animalistas apuntan que, nos últimos anos, documentáronse ata 250 casos de cabalos en situacións similares en Galicia.