Ana Pontón non lle ve a lóxica a algunhas medidas da Xunta para entrar na nova normalidade
A portavoz nacional do BNG cre que se debe recoñecer o sacrificio que "fixeron os galegos e as galegas durante estes meses".
Por Europa Press / Redacción | SANTIAGO DE COMPOSTELA | 13/06/2020 | Actualizada ás 17:31
A portavoz nacional do BNG, Ana Pontón, atribúe ao "esforzo" dos galegos "a medalla e o mérito" de que a partir deste luns Galicia sexa pioneira no Estado ao levantar o estado de alarma e entrar na nova normalidade.
En declaracións aos medios este sábado, a líder nacionalista considera que isto é posible grazas ao "comportamento exemplar" dos cidadáns da Comunidade galega. "Desde o BNG pensamos que o que hai que recoñecer é o inmenso sacrificio que fixeron os galegos e as galegas ao longo destes meses, e son eles os que teñen que colgarse esta medalla", insistiu.
Non en balde, a tamén candidata do Bloque á Xunta aproveitou para criticar algunhas das medidas que rexerán a nova normalidade en Galicia e que este sábado foron publicadas no Diario Oficial de Galicia (DOG).
"Recollen cuestións que chaman a atención, como a previsión de celebrar festas infantís a partir do 1 de xullo ou que haxa campamentos ao aire libre con ata 250 menores mentres as escolas infantís permanecen pechadas", explicou.
Neste sentido, Ana Pontón di non entender "onde está a lóxica" destas medidas, "nun momento no que tantas familias teñen dificultades para conciliar vida laboral e o coidado dos fillos".
"Dá a sensación de que o señor Feijóo descoñece os problemas que teñen os galegos e as galegas para conciliar e que esta lle parece unha cuestión menor", criticou a portavoz nacional do BNG, quen pediu "rectificar" esta e outras medidas.
