Feijóo nega que se evitase derivar maiores aos hospitais e sinala que se "deron altas" a persoas centenarias
O presidente da Xunta e candidato do PP para as eleccións do 12x, reivindicou que o obxectivo do seu Goberno foi garantir a atención a todos os pacientes e esgrimiu que a ningún dos que o necesitou "lle faltou un respirador".
Por Europa Press / Redacción | SANTIAGO DE COMPOSTELA | 17/06/2020 | Actualizada ás 17:52
O presidente da Xunta, Alberto Núñez Feijóo, defendeu este mércores a xestión realizada polo Goberno autonómico nas residencias durante o pico da pandemia e esgrimiu que non houbo "nin a máis mínima estratexia para non derivar aos hospitais" a maiores e que se actuou sempre "de acordo coa prescrición médica".
Preguntado polas denuncias contra DomusVi, Feijóo defendeu a xestión das residencias galegas. "Hai 25.000 usuarios e cinco infectados nas nosas residencias. E a nosa porcentaxe de falecementos en residencias é das máis baixas de España", argumentou.
A continuación, engadiu que nos hospitais galegos "déronse altas a persoas de 107 anos, de 104, de 103 e de 102", antes de defender que "non houbo nin a máis mínima estratexia" para evitar a derivación de maiores a hospitais, seguindo sempre o criterio dos médicos dos centros.
"A NINGÚN LLE FALTOU RESPIRADOR"
De feito, Feijóo reivindicou que o obxectivo do seu Goberno foi garantir a atención a todos os pacientes e esgrimiu que a ningún dos que o necesitou "lle faltou un respirador".
"Nin os datos de mortalidade, nin os datos de infectados, nin os de supervivencia acreditan nin a máis mínima conduta reprochable neste ámbito", resolveu.
